11 февраль куни Ўзбекистоннинг Қатарга янги тайинланган фавқулодда ва мухтор элчиси Ашраф Ходжаев Доха шаҳрига ташриф буюрди, деб хабар бермоқда «Дунё» ахборот агентлиги.
Қайд этилишича, 43 ёшли дипломат Тошкент давлат шарқшунослик институти, Ўзбекистон Миллий университети, Пекин университетини тамомлаган. Иқтисодиёт фанлари номзоди (PhD) илмий даражасига эга.
Ашраф Ходжаев ТИВ тизимидаги фаолиятини 2005 йилда референт сифатида бошлаган. Ўтган йиллар давомда у вазирлик марказий аппаратида, шунингдек, Нью-Йорк шаҳридаги Ўзбекистоннинг БМТдаги доимий ваколатхонасида ва Буюк Британиядаги элчихонада турли лавозимларда ишлаган.
2018 йилдан буён ТИВ Иқтисодий дипломатия департаменти бошқарма, бош бошқарма бошлиғи ва директори бўлиб фаолият олиб борган.
Маълумот учун, Ашраф Ходжаев Ўзбекистоннинг Қатардаги биринчи элчисидир. Элчихона Доҳада 2023 йилнинг декабида очилган. 2023 йил май ойида эса Тошкентда ушбу давлатнинг дипломатик ваколатхонаси иш бошлаганди.
