Президент 22 январь куни Самарқанд шаҳрида жамоат транспорти учун электробуслар харид қилиш тўғрисидаги қарорни имзолади.
Ҳужжатда 2023 йил май ойида Ўзбекистон ҳамда Европа тикланиш ва тараққиёт банки ўртасида Самарқанд шаҳри жамоат транспорти учун электробуслар харид қилиш бўйича кредит шартномаси имзолангани қайд этилган. Кредит ҳажми 49 миллион долларни ташкил этади.
Эслатиб ўтамиз, «Газета.uz» ўтган йилнинг апрель ойида автобуслар Хитойнинг Yutong компанияси томонидан етказиб берилиши ҳақида ёзганди. Дастлабки 100 та электробусдан 6 таси 2023 йилнинг биринчи ярим йиллигида, қолган 94 таси эса учинчи чорак якунигача етказиб берилиши маълум қилинганди. ЕТТБ Самарқанд шаҳри учун электробуслар партияси, улар учун қувватлаш шохобчалари ва бошқа инфратузилма объектларини сотиб олишга 95 млн еврогача маблағ ажратиши мумкинлиги хабар қилинганди.
Янги қарорда лойиҳа қиймати 61,99 млн долларга баҳоланган, шундан ЕТТБ қарз маблағлари юқорида айтиб ўтилганидек 49 млн долларга тенг, Ўзбекистон улуши эса 12,99 млн долларни ташкил этади (жумладан, ҚҚСни қоплаш, божхона имтиёзлари ва бошқалар).
Ҳужжатда Yutong компанияси халқаро тендер ғолиби деб топилгани ва у билан 100 та электробус ва 50 та қувватлаш қурилмасини сотиб олиш бўйича 29,7 млн долларлик шартнома имзолангани айтилади.
Шартномага мувофиқ, 6 та электробус ва 3 та қувватлаш қурилмаси 2023 йилнинг май ойида етказиб берилган. Янги жадвалга кўра (4-илова) яна 30 та электробус ва 15 та қувватлаш қурилмаси 2024 йилнинг биринчи чорагида, қолган 64 та электробус ва 32 та қувватлаш қурилмаси эса 2024 йилнинг иккинчи чорагида келтирилади.
Қолган 32,29 млн долларга Самарқанд шаҳрида ҳайдовчиларни тайёрлаш ва уларнинг малакасини ошириш ўқув марказини ўз ичига олган, ҳаракат таркибини сақлаш, техник хизмат кўрсатиш ва таъмирлаш учун мўлжалланган автобус саройини реконструкция қилиш ва ташқи электр таъминоти объектларини қуриш назарда тутилган.
Электроавтобуслар лойиҳа доирасида танлаб олинган мунтазам йўналишларга брутто-шартнома асосида, истисно тариқасида, тўғридан-тўғри 7 йил муддатга бириктирилади. Бунда йўналишлар нархи белгиланган тартибда шакллантирилади.
Ҳужжатда икки ой муддатда Нукус шаҳри ва вилоят марказларида жамоат транспорти учун электробуслар харид қилиш лойиҳаларини ишлаб чиқиш бўйича ҳам кўрсатмалар берилган.
