Давлат активларини бошқариш агентлиги жамоатчилик томонидан билдирилган фикрларни ўрганган ҳолда «Пахтакор футбол клуби» масъулияти чекланган жамиятининг 100 фоиз давлат улуши бўйича оммавий савдо жараёнлари вақтинчалик тўхтатилганини маълум қилди.
16 январь куни Давлат активларини бошқариш агентлиги «Пахтакор футбол клуби» МЧЖнинг 100 фоиз давлат улуши савдога чиқарилганини маълум қилганди. Клубни сотиб олувчи харидор кейинчалик қуйидаги талабларга риоя қилиши керак бўлади:
- футбол клубининг фаолиятини сақлаб қолиш, ривожлантириш ва халқаро даражага олиб чиқиш;
- футбол клуби балансидаги барча спорт объектларидан, шу жумладан, футбол майдонидан фақатгина спорт фаолияти йўналишларида фойдаланиш;
- «Пахтакор» футбол клуби академияси фаолиятини сақлаб қолиш ва ривожлантириш.
«Пахтакор» Ўзбекистонда 1956 йилдан буён фаолият юритиб келаётган профессионал футбол клуби ҳисобланади. Жамиятнинг юридик манзили: Тошкент шаҳри Ислом Каримов кўчаси 98А-уй. Актив эгаллаган майдон 24,1 гектарни ташкил этади. Қурилиш ости майдони: 83 минг 332,73 метр квадрат (8,3 гектар), фойдали майдони эса 24 минг 262,57 метр квадрат (2,4 гектар). Актив ҳозирда «Муниципал активларни бошқариш маркази» давлат унитар корхонаси балансида ҳисобланади.
Клуб сотилиши эълон қилинганидан кейин жамотчилик вакиллари клубга қўшиб Тошкент марказидаги стадион ҳам сотилаётганига эътироз билдирди. Жумладан? спорт журналисти, блогер Қаҳрамон Асланов ўзининг Kun.uz учун ёзган мақоласида моҳиятан тадбиркор қайси бирига пул тўлайди, «Пахтакор» клубигами ёки «Пахтакор» стадионигами, деган саволни берди. Журналистнинг фикрича, зинҳор «Пахтакор» футбол клуби ва «Пахтакор» стадионини қўшиб сотмаслик керак.
Молиячи Отабек Бакиров эгалик ҳуқуқи расмийлаштирилганидан кейин харидорга қўйиладиган талаблар осонгина ўзгартирилишидан хавотир билдирган.
«Харидор академия ва клуб фаолиятини давом эттириши, клуб балансидаги барча спорт объектларидан, жумладан, футбол майдонидан фақатгина спорт фаолияти йўналишларида фойдаланиши керак бўлади. Лекин бу ҳозирча. Кейинчалик эгалик хуқуқи расмийлаштириб олингач ва, айтайлик, шаҳар четида бошқа стадион қурилгач, талаблар осонгина ўзгартирилишини истисно этиб бўлмайди», — деб ёзган у.
Шунингдек, Отабек Бакиров кейинги постида шундай дейди: «Кимга „Пахтакор“ стадионини эгаллаб турган фалон гектар майдон керак бўлса, марҳамат, бозор нархида сотиб олиб, тадбиркорлик қилсин. Кимга футбол керак бўлса, марҳамат, „Пахтакор“ футбол клубини мавжуд бўлган қийматида сотиб олиб, ривожлантирсин. Марҳамат».
Клубларнинг хусусийлаштирилиши
Клуб хусусийлаштирилиши президентнинг 2023 йил 24 мартдаги қарорига асосан юз бермоқда. Мазкур қарорда, шунингдек, «Бухоро», «Насаф», «Машъал», «Локомотив», «Олмалиқ», «Металлург», «Бунёдкор», «Шўртан», «Навбаҳор лочинлари», «Динамо плюс» футбол клублари ҳам хусусийлаштирилиши белгиланган.
Шунингдек, Давактив Осиё Футбол Конфедерацияси томонидан футбол клубларининг бир давлат ташкилоти тасарруфида бўлиши соғлом рақобат муҳитини яратишга тўсқинлик қилиши билдирилганини қайд этган. Бугунги кунда футбол клублари давлат ташкилотлари ва давлат иштирокидаги корхоналар тасарруфида қолиб, умумий бенефициар давлат бўлиб қолмоқда. Бу ҳолат халқаро принципларга мувофиқ ҳисобланмайди. Шунга кўра, дастлаб жозибадорлиги юқори бўлган футбол клубларини хусусийлаштирган ҳолда хусусий секторнинг улушини босқичма-босқич ошириш режалаштирилган.
ОФКнинг бу талаби ҳақида 2021 йилда Ўзбекистон Профессионал футбол лигаси директори Диёр Имомхўжаев ҳам гапириб ўтганди. Ўшанда бирданига 9 та Суперлига ва 4 та Про лига жамоасининг акциялари ҳокимликлар ва давлат компаниялари маъмуриятига уларни кейинчалик сотиш шарти билан топширилганди.
«ОФК барча клублар бир ташкилотга тегишли бўлиши мумкин эмаслиги баён этилган Лицензиялаш регламенти билан бунга қарши чиқди. Шундан келиб чиқиб, Вазирлар Маҳкамаси профессионал футбол клублари устав капиталидаги давлат улуши ва хўжалик жамиятларининг улушларини баланс қийматига ошириш ҳисобига берилиши ва кейинчалик белгиланган тартибга сотилиши бўйича қарор чиқарди. Яъни 2030 йилга қадар бу 13 клуб барибир сотиб улгурилиши керак», — деганди ўшанда Диёр Имомхўжаев.
Шунингдек, 15 январь куни Диёр Имомхўжаев «Газета.uz»нинг Мифономика лойиҳасида «Пахтакор» ва «Сурхон» футбол клублари хусусийлаштирилиш арафасида турганини маълум қилганди.
ЎзПФЛ раҳбари суҳбатда давлат 2030 йилгача профессионал футболни молиялаштиришни тўхтатиш, клубларни хусусийлаштириш ва футболни тўлиқ бозор механизмига ўтказиш ниятида эканини қайд этди.
«Хусусийлаштириш арафасида турган клублар бор, биринчиси — „Пахтакор“. Барча шу ниятда. Ҳаммаси шаффоф бўлсин, сотувга қўйилсин, сотиб оладиган одам сотиб олсин. Инвестор ҳам тайёр, бу — катта лойиҳа. Иккинчиси — „Сурхон“. Бу клуб аслида бир йил олдин хусусийлаштирилиши керак эди. Лекин клубда бундан аввал ишлаган одамлар йўл қўйган баъзи хатолар бор, Сурхондарё прокуратураси буни ўрганиш жараёнида, иш жуда жиддий кетмоқда», — деди ПФЛ раҳбари.
Унинг таъкидлашича, ҳозирнинг ўзида сотувга қўйишга муносиб бўлган ўзининг пойдевори, стадиони, ери бўлган «Насаф» ва «Бунёдкор» каби тайёр футбол клублари бор. Лекин уларни сотиб олувчи инвесторлар масаласида муаммолар мавжуд.
