Қаттиқ маиший чиқиндиларни (ҚМЧ) олиб кетиш хизмати катта операцияларни бажариш учун қарзни тўлаш керак бўлган коммунал тўловлар рўйхатига киритилмоқда. Бу таклиф президентнинг 4 январдаги фармони билан маъқулланган («Газета.uz»да ҳужжат нусхаси мавжуд).
Жумладан, Ўзбекистонда 2024 йилнинг апрель ойидан кўчмас мулк ва автотранспорт воситалари билан боғлиқ битимлар чиқиндини олиб кетиш хизматлари учун қарздорлик бўлмаган тақдирдагина нотариал тасдиқланади. Қарзнинг мавжудлиги ёки йўқлиги ҚМЧларни тўплаш ва олиб чиқиш учун мажбурий тўловларни тўлаш ва ҳисобини юритишнинг ягона электрон тизими орқали онлайн тарзда текширилади.
Тизимнинг узлуксиз ишлашига Санитар тозалаш ишларини ташкил этиш республика маркази масъул бўлади. Чиқиндиларни утилизация қилиш хизматлари ва абонент ҳисоби учун тўловлар фақат марказнинг биллинг тизими, тўлов тизимлари ёки банк касса аппаратлари орқали амалга оширилади.
Шу кундан бошлаб барча санитария тозалаш корхоналари фуқароларга ягона электрон тизимга уланган ҳолда хизмат кўрсатиши шарт. Акс ҳолда, улар билан тузилган шартномалар бекор қилинади, улар хизмат кўрсатган ҳудудлар эса давлат-хусусий шерикчилик асосида бошқа корхоналарга берилади.
Аввал хабар берганимиздек, Ўзбекистонда 2024 йилнинг 1 июнидан чиқинди хизматидан қарздорлик юзага келган тақдирда, электр энергияси учун тўловларни чеклаш бошланади. Тартиб аввалига Тошкент шаҳри, Нукус ва вилоятлар марказларида, кейин эса бутун республика бўйлаб амал қилади.
Биллинг тизимлари ва ҚМЧ хизматлари тўловларини ўз вақтида амалга оширишни техник қўллаб-қувватлаш учун чиқинди тарифи бўйича тушган маблағларнинг 1 фоизи «Ҳудудий электр тармоқлари» ва Санитар тозалаш ишларини ташкил этиш республика маркази ҳисобига ўтказилади.
