Япония ҳукумати Россияга қарши санкцияларни кенгайтирди, жумладан, чекловлар рўйхатидан Ўзбекистон компаниялари ҳам жой олди.
Япониянинг шахслар бўйича санкциялар рўйхатига 35 киши киради. 22 декабрдан кучга кирадиган экспорт тақиқига Россиядан 57 та ташкилот, БААдан иккита, Суриядан битта ва Ўзбекистондан иккита ташкилот дуч келган.
Хусусан, Alfa Beta Creative ва GFK Logistic Asia компанияларига нисбатан чекловлар жорий этилди. Ёзда Европа Иттифоқи бу компанияларга нисбатан санкциялар киритганди.
Ўзбекистон Корхоналар ва ташкилотларнинг ягона давлат реестрига кўра, Alfa Beta Creative 2022 йил 6 июнь куни 2 миллион сўм устав капитали билан Тошкент шаҳрида рўйхатдан ўтган, асосчиси ва директори Светлана Каримовна Хайдари, ҳозирда эса Олег Валерьевич Грабилин. Асосий фаолият тури бошқа офис техника ва жиҳозларнинг улгуржи савдоси.
GFK Logistic Asia 2018 йил 28 мартда ташкил этилган, устав капитали 200 миллион сўм. Қуруқлик транспорти соҳасида хизматлар кўрсатади. Таъсисчилари Альберт Абдусаматович Шукуров ва GFK Logistic Asia бўлган, ҳозирда Олег Грабилин ва GFK Logistic Asia.
АҚШ апрель ойида ушбу ўзбек компанияларига қарши санкциялар киритганди. АҚШ Савдо вазирлиги малумотларига кўра, улар Россия ҳарбий ва мудофаа саноати эҳтиёжлари учун АҚШ товарларини сотиб олишда санкцияларни четлаб ўтишга ҳаракат қилган. Европа Иттифоқи июнь ойида чекловларга қўшилган.
Токио, шунингдек, 2024 йил 1 январдан саноатда фойдаланиш учун мўлжалланмаган Россия олмосларини олиб кириш тақиқланишини маълум қилди.
