Истиқболли лойиҳалар миллий агентлиги (ИЛМА) электрон тижорат бозори ҳамда лотереялар ва букмекерлик фаолиятини ташкил этиш соҳасида регуляторга айланади. Бу президентнинг 30 ноябрдаги қарорида кўзда тутилган.
ИЛМАга электрон тижоратни тартибга солиш ва ривожлантириш (ҳозирда бу билан Рақамли технологиялар вазирлиги ҳамда Инвестициялар, саноат ва савдо вазирлиги шуғулланади) ҳамда лотереялар ва букмекерлик фаолиятини ташкил этишни тартибга солиш (Иқтисодиёт ва молия вазирлиги) соҳасидаги вазифалар, функциялар ва ваколатлар ўтказилади.
Агентлик барча онлайн савдо платформаларининг сотувчилар ва харидорларнинг мулкий манфаатларини кафолатлаш бўйича методологиясини ўрганади ва таҳлил қилади.
Бундан ташқари, ИЛМА рақамли бозорлар фаолиятини лицензиялаш тартиб-қоидаларини белгилайди, сўнгра банкларнинг EPOS терминаллари орқали ноқонуний фаолиятни амалга оширилган тақдирда, «уларнинг фаолиятини чеклашгача бўлган таъсирчан чоралар кўриш» бўйича топшириқ беради.
Шунингдек, ижтимоий тармоқларда белгиланган талабларга риоя қилмасдан электрон тижоратни ташкил этган шахсларни жазолашнинг ягона механизмини тасдиқлаш кўзда тутилган. Солиқ органлари, вазирлик ва идоралар вакилларидан иборат ишчи гуруҳ ижтимоий тармоқлар ва онлайн платформаларда бундай фактларни аниқлайди.
Аҳоли ўртасида ижтимоий тармоқлардаги ноқонуний савдо платформаларидан фойдаланишда сотувчи ва харидорларнинг мулкий ҳуқуқлари кафолатланмагани юзасидан тушунтириш ишлари олиб борилади.
ИЛМА, шунингдек, Ахборот ва оммавий коммуникациялар агентлигига таваккалчиликка асосланган ўйинларда ноқонуний иштирок этиш ва капитал операцияларини амалга ошириш имкониятини берувчи сайтларни Ўзбекистон қонунчилигида тарқатилиши тақиқланган маълумотларни ўз ичига олган ресурслар реестрига киритиш тўғрисида сўров юбориши мумкин.
Бундан ташқари, агар транзакция коди маълумотлари ёки бошқа идентификаторлар капитал операциялари амалга оширилаётгани, таваккалчиликка асосланган ўйинлар (онлайн казино ва лотереялар) ташкил қилиш ва ўтказиш билан боғлиқликни кўрсатаётган бўлса, банклар Ўзбекистондан ташқаридаги қабул қилувчиларга пул ўтказишни тақиқлайди.
Аввал хабар берганимиздек, ўғрилик ва фирибгарликнинг олдини олиш мақсадида Марказий банк шубҳали операциялар содир бўлган тақдирда банк карталари ва ҳисоб рақамларини блоклашни талаб қилиш ҳуқуқини олди. Банклар ва тўлов ташкилотлари антифрод тизимларини жорий қилишни ва йирик p2p ўтказмаларини назорат қилишни бошлайди.
Банклар ва тўлов тизимларининг мобил иловаларидаги хавфсизлик даражасини ошириш учун янги рўйхатдан ўтган фойдаланувчининг маблағларини ўтказиш имкониятини 1 соатгача чеклаш режалаштирилмоқда. Фойдаланувчиларга унинг профилига кирилганлик ҳақида SMS хабарнома юборилади.
