Россиянинг «Тануки» (япон ошхонаси) ресторанлари тармоғи ва Bulldozer Group ресторан холдинги асосчиси Александр Орлов федерал қидирувга берилди, деб хабар қилди «Коммерсантъ» Россия ИИВ маълумотлар базасига таяниб.
Қайд этилишича, у жиноий модда бўйича қидирувга берилган, аммо айнан қайси модда эканига аниқлик киритилмаган.
Нашрнинг ёзишича, ресторатор Россияни 2022 йил бошида тарк этган. 2022 йил июль ойида у хориждаги лойиҳаларини ривожлантиришга эътибор қаратишини айтган. Ўша йилнинг август ойида у ўзининг Россиядаги учта активидаги 33,3% улушини сотди: «Тануки», «Тануки-Краснодар» ва «Тануки-Н.-Новгород». Бунгача Александр Орлов Москвадаги «Такахули», «Хорошая девочка», Lou Lou, Eshak ва «Юг» ресторанларини БАА инвесторларига сотган.
Александр Орлов БАА, Гонконг, АҚШ, Қозоғистон ва Ўзбекистонда ҳам ресторанларга эгалик қилади. Унинг Тошкентда TOKU (2021 йилда очилган), «Тануки» (2022 йилда иш бошлаган), «Хорошая девочка» ва ТКХ (маҳаллийлаштирилган «Такахули», ҳар иккиси 2023 йилда очилган) ресторанлари фаолият юритади.
2022 йилда Александр Орлов Spot нашрига ўзининг Bulldozer Group ресторан холдингини бўлганини маълум қилган. Қозоғистон ва Ўзбекистондаги лойиҳалар Sun Group компаниясига берилган.
