Россиянинг Иркутск вилоятига жўнатилган атиргул партиясида карантин остидаги ҳашарот аниқланди, дея хабар бермоқда Ўзбекистон Ўсимликлар карантини ва ҳимояси агентлиги матбуот хизмати.
Иркутскка Тошкент вилоятининг Зангиота туманида етиштирилган 3150 дона атиргул жўнатилган. Дастлабки фитосанитар назорат давомида ўсимлик тамаки оққаноти ҳашароти билан зарарланганлиги аниқланган.
Агентлик бу ҳақда тадбиркорлик субъектини огоҳлантирган, тамаки оққаноти зарарли карантин ости ҳашароти ҳисобланиши, қарши кураш чоралари ҳақида кўрсатма ва тавсиялар берилган. Шу сабабди унга фитосанитар рухсатнома берилиши рад этилган.
«Огоҳлантиришга қарамай тадбиркорнинг кафолат хати асосида гуллар партияси экспорт учун юклатилган. Табиийки, зарарланган ўсимликни мамлакат ҳудудига олиб киришга „Росселхознадхор“ томонидан рухсат этилмаган. Атиргуллар тадбиркорнинг розилиги билан ёқиш йўли орқали йўқ қилинган», — дейилади хабарда.
Агентликнинг қайд этишича, гуллардаги ҳашаротларни фумигация, яъни зарарсизлантириш орқали йўқ қилиб бўлмайди. Сабаби бундай ҳолатда маҳсулот товар сифатида жозибадорлигини йўқотади.
Ушбу партия билан бир кунда бошқа тадбиркорлик субъекти томонидан 9000 дан ортиқ гул экспертиза хулосаси асосида фитосанитар рухсатнома расмийлаштирилиб, экспорт учун юклатилган. Бу партиядаги ўсимлик маҳсулотига эътироз билдирилмаган.
Маълумот учун, тамаки оққаноти Европа, Шимолий ва Жанубий Америка, Осиё, Австралия ва Океания давлатларида учрайди. Ҳашаротлар ўсимлик танасидаги суюқликни сўриб, унинг касалланишига олиб келади.
