Октябрь ойида «Тошшаҳартрансхизмат» компаниясига қарашли автобусларда 25 млн 39 мингтадан ортиқ ташувлар амалга оширилди. Бу ҳақда компания матбуот хизмати маълум қилди.
Ўтган ой билан солиштирганда, ташишлар сони 2 млн 50 минг нафарга ортган. Бундан ташқари, октябрда йўналишга чиқарилган автобуслар сони 46 898 та (сентябрга қараганда 9599 тага кўп)ни ташкил этган.
Ўтган йилнинг айни икки ойида ҳозиргидан анча кам йўловчи автобусдан фойдаланганди. Хусусан, йўловчилар сентябрда — 11,6 млн га яқин, октябрда — 13,650 млн марта автобусларда ташилган.
Эслатиб ўтамиз, 2023 йилнинг баҳорида Тошкентга янги катта ва ўта катта сиғимли автобуслар ҳамда электробуслар харид қилинганидан сўнг жамоат транспортидаги йўловчилар сони ортди.
Қолаверса, янги автобус йўналиши ва энг тиғиз вақтларда ишловчи учта вақтинчалик экспресс йўналиш ташкил этилди.
