Ўзбекистонда жисмоний шахслар ҳамда чет эл фуқаролари учун мобил қурилмаларини рўйхатдан ўтказиш жараёнида бир қатор қулайликлар яратилмоқда. 27 октябрь куни «ICTWEEK UZBEKISTAN — 2023» ахборот-коммуникация технологиялари ҳафталигида қатнашган «Газета.uz» мухбири унинг тафсилотлари ҳақида хабар берди.
Тадбирда туризмни янада ривожлантириш, фуқароларга қулай шароит яратиш ҳамда мобил қурилмаларнинг ноқонуний рўйхатга олинишининг олдини олиш орқали жисмоний шахсларнинг ҳуқуқларини ҳимоя қилиш мақсадида яна бир ҳукумат қарори қабул қилингани айтилди. Эслатиб ўтамиз, аввалроқ, Жаҳон банки иқтисодчиси Винаяк Нагараж Ўзбекистонда UZIMEI мобил қурилмаларини рўйхатдан ўтказиш тизимини «бюрократик, ноқулай ва фуқаролар учун фойдасиз», деб атаб, у «Ўзбекистонни орқага тортаётганини» таъкидлаганди.
Унга кўра, биринчидан, жисмоний шахслар хориждан ўзи билан олиб кирган иккита мобил қурилма (телефон)ни божхона тўловларисиз рўйхатдан ўтказиши имконияти яратилди. Аввал битта телефонни олиб кириш мумкин эди.
Иккинчидан, телефонларни UzIMEI тизимида рўйхатга олишда масофадан туриб (онлайн) шахсни биометрик идентификация (Face-ID) қилиш жорий этилди. Ушбу қулайлик орқали фуқароларнинг шахсга доир маълумотларидан ўзгалар фойдаланишининг олди олинади. Мазкур технология ёрдамида жисмоний шахс ўзига тегишли мобил қурилмаларни рўйхатга олишни ўзининг биометрик маълумотларидан фойдаланган ҳолда онлайн тарзда бажаради.
Бунда, жисмоний шахс IMEI кодларини рўйхатга олишни расмий веб-сайт (uzimei.uz), Ягона интерактив давлат хизматлари портали ва унинг мобил талқини ҳамда тизим рўйхатга олувчиларига мурожаат қилиб, биометрик идентификация орқали рўйхатдан ўтказиши мумкин.
Учинчидан, Ўзбекистонга хизмат сафари ёки туризм учун келаётган хориж фуқаролари мобил қурилмаларини рўйхатдан ўтказмасдан 60 календарь кунигача юриши мумкин. Аввал, фойдаланиш даври 30 куни эди.
Шу билан бирга, фуқаролар томонидан ҳар бир олиб кирилаётган мобил қурилма божхона чегарасини кесиб ўтишда декларацияланиши ҳамда декларация натижаси бўйича мобил қурилмаларни рўйхатга олиш тизимига интеграция қилиниши улар томонидан қонуний олиб кирилишига асос бўлади.
Бу билан ноқонуний хатти-ҳаракатларнинг олди олинишига эришилади. Бунинг натижасида фуқаролар ўзи билан олиб кирган қўшимча иккинчи мобил қурилмани UzIMEI тизимида муаммосиз рўйхатдан ўтказиши мумкин бўлади.
