Бирлашган Миллатлар Ташкилоти бош котиби Антониу Гутерриш Хавфсизлик кенгаши йиғилишида «ҲАМАСнинг [Исроилга] ҳужуми йўқ жойдан пайдо бўлмаганини тан олиш муҳим», дея таъкидлади. Гутерришнинг нутқи Исроил расмийларининг кескин танқидига сабаб бўлди, жумладан, унинг БМТ бош котиблигидан истеъфога чиқиши кераклиги айтилди, дея хабар бермоқда The Times of Israel.
«Болалар, аёллар ва қарияларнинг қирғин қилинишига „тушуниш“ билан ёндашувчи бош котиб БМТни бошқаришга ярамайди. Мен уни зудлик билан истеъфога чиқишга чақираман», деб ёзди Исроилнинг БМТдаги доимий вакили Гилад Эрдан X тармоғида (собиқ Twitter). «Таърифга сўз йўқ», — деб қўшимча қилган у.
Гутерришнинг бундай баёнотидан кейин Исроил БМТ вакилларига виза бермаслигини маълум қилди. Эрданнинг сўзларига кўра, БМТ бош котибининг гуманитар масалалар бўйича ўринбосари Мартин Гриффитснинг Исроилга кириш бўйича сўрови аллақачон рад этилган. «Уларга дарс бериб қўйиш вақти келди», — деган Исроилнинг БМТдаги доимий вакили.
БМТ Хавфсизлик кенгаши йиғилишида Гутерриш юқоридаги фикридан кейин уни юмшатишга ҳаракат қилган. «Фаластин халқининг норозилик кайфияти ҲАМАСнинг даҳшатли ҳужумларини оқлай олмайди. Даҳшатли ҳужумлар Фаластин халқининг жамоавий жазоланишини оқлай олмайди», — деб ёзди БМТ бош котиби.
Эслатиб ўтамиз, 7 октябрь куни ҲАМАС Исроил ҳудудига минглаб ракеталарни учирди ва Ғазо сектори яқинида жойлашган аҳоли пунктларига ҳужум қилиб, одамларни гаровга олди. Бунга жавобан Исроил Ғазо секторига зарба бериб, қуруқликдаги операцияга тайёргарлик кўра бошлади. Айни вақтгача Исроил расмийларига кўра, ҲАМАС ҳужуми оқибатида 1,4 мингдан ортиқ одам ҳалок бўлган. Фаластин маъмурияти Ғазога қилинган ҳужумларда 5 мингдан ортиқ одам ҳалок бўлганини маълум қилган.
БМТ бош котиби Антониу Гутерриш ҲАМАС ҳужумидан кейин Яқин Шарққа келганди. У, хусусан, Ғазо сектори ва Миср чегарасидаги Рафиах назорат-ўтказиш пунктига ташриф буюрган ва Қоҳира Тинчлик саммитида иштирок этган. Ўшанда Гутерриш зудлик билан Ғазога гуманитар ёрдам етказиш, ҲАМАС томонидан гаровга олинганларни озод қилиш ва ўт очишни тўхтатишга чақирганди.
