Германия федерал канцлери Олаф Шольц 17 октябрь куни Исроилга бориб (бу ҲАМАС ҳужумидан кейин Исроилга биринчи бор хорижий раҳбарнинг ташрифи бўлди), мамлакат бош вазири Биньямин Нетаньяху ҳамда ҲАМАС томонидан гаровга олинган немисларнинг яқинлари билан учрашди.
Канцлер Исроилдан Мисрга учмоқчи бўлган вақтда — самолёт Бен-Гурион аэропортидан ҳавога кўтарилмоқчи бўлганида Тель-Авивда ҳаво ҳужумидан огоҳлантирувчи сиреналар чалинди. Германия делегацияси зудлик билан самолётдан эвакуация қилинди ва учиш-қўниш йўлагига ётишига тўғри келди. Кейин Шольц бомбапаноҳ жойлашган аэропорт биносига олиб кетилди. Сигнал тўхтагач, канцлер Мисрга учиб кетди.
Ғазодаги Соғлиқни сақлаш вазирлиги (ҲАМАС назоратида) «Ал-Аҳли» касалхонасида юз берган портлашда 471 киши ҳалок бўлганини маълум қилди. Бир кун аввал вазирлик воқеа оқибатида 200 дан 300 нафаргача одам ҳалок бўлганини билдирганди.
Исроил Работ (Марокаш) ва Қоҳирадаги (Миср) элчихона ходимларини эвакуация қилди, дея хабар берди «Едиот ахронот» нашри. Бир кун аввал бу ва бошқа шаҳарларда Ғазо секторидаги шифохонага ҳужум фонида норозилик намойишлари бошланиб кетганди.
АҚШ президенти Жо Байден ҲАМАСнинг Исроилга ҳужумини 11 сентябрь воқеаларига қиёслади. Оқ уй хабарига кўра, Америка президенти исроилликларни «ғазабга берилмасликка» чақирди.
«Мен бу ҳақда огоҳлантираман. Ғазабни ҳис қилганингизда, унга берилиб кетманг. АҚШда 11 сентябрь воқеаларидан кейин биз ҳам ғазаблангандик. Адолат излаган бўлсак-да, хатоларга ҳам йўл қўйдик», — деди Америка етакчиси. Байден фаластинликларнинг катта қисми ҲАМАСга алоқадор эмаслигини ҳам қўшимча қилди.
АҚШ президенти Холокостни ҳам эслаб ўтди. «Ўшанда дунё томошабин бўлиб турди ва ҳеч нарса қилмади. Биз бу сафар кузатиб, ҳеч нарса қилмай ўтирмаймиз. Бугун ҳам эмас, эртага ҳам эмас, умуман ҳеч қачон қўл қовуштириб ўтирмаймиз».
Байден, шунингдек, фаластинликлар учун 100 млн долларлик инсонпарварлик ёрдамини эълон қилди. Бу ёрдамни Ғазо секторидагилар ҳам, Ғарбий соҳилдагилар ҳам олиши мўлжалланган.
АҚШ президенти агар ҲАМАС бу ёрдамни ўғирласа, бу «террорчилик гуруҳи Ғазо секторидаги тинч аҳоли манфаатларини акс эттирмаслигини яна бир бор исботлайди», дея таъкидлаган.
Исроил бош вазири Биньямин Нетаньяху офиси Исроил ҲАМАС гаровга олинганларни озод қилмагунча Исроил ўз ҳудудидан Ғазо секторига инсонпарварлик ёрдами жўнатилишига рухсат бермаслиги ҳақида баёнот берди. Шу билан бирга, Исроил Миср ҳудуди орқали инсонпарварлик ёрдами етказилишига тўсқинлик қилмаслиги айтилган.
Newsweek нашрининг ёзишича, Ғазо сектори маъмурлари юзлаб ўлимлар ҳақида маълумот бераётганига қарамай, АҚШ ва Исроил разведкаси «Ал-Аҳли» касалхонасидаги портлашда «кўпи билан бир неча ўнлаб» одам ўлган деб ҳисобламоқда.
«Бизга маълум бўлишича, Исроил шифохонага зарба бермаган. Тасвирлар яна шуни кўрсатадики, ракета Ғазодан учирилган ва шифохона яқинига келиб тушган, унинг устига эмас», — дея АҚШ Мудофаа разведка бошқармасининг катта офицеридан иқтибос келтирган нашр.
Newsweek`нинг яна бир манбаси — «Ал-Аҳли» воқеаси юзасидан ишлаётган АҚШ Ҳарбий-ҳаво кучлари офицерининг таъкидлашича, портлашда қанча одам ҳалок бўлганини на АҚШ, на Исроил тараф аниқ билмайди.
«Бизнинг ва Исроилнинг разведка маълумотлари кўпи билан бир неча ўнлаб [ўлимлар кузатилганини] тахмин қилмоқда. Бу фожиа эмас, демоқчимасман, лекин бу ҲАМАСнинг навбатдаги жиддий бўрттириши ва очиқ ёлғони. [Портлаш учун] Исроил эмас, фаластинликлар жавобгар», — дея қўшимча қилган у.
Миср Ғазо секторига гуманитар ёрдам етказиш учун «барқарор» коридор очилишини эълон қилди. 19 октябрга ўтар кечаси Миср ҳукумати Ғазо сектори билан чегарадаги Рафах чегара пунктини очишга тайёрлигини маълум қилди. Бу бўйича АҚШ президенти Жо Байден ва Миср президенти Абдулфаттоҳ ас-Сиси келишиб олган.
Жо Байденнинг сўзларига кўра, гуманитар ёрдам юкланган биринчи юк машиналари фақат жума кунидан бошлаб Ғазо секторига кира олади.
«Улар йўлни таъмирламоқчи. Юк машиналари ўтиши учун йўлдаги чуқурларни тўлдиришлари керак. Уларнинг ҳисоб-китобларига кўра, бу саккиз соат давом этади. Шунингдек, агар ҲАМАС инсонпарварлик юкларини етказиб беришга халақит бермоқчи бўлса, Қўшма Штатлар Ғазо секторига бундай ёрдам кўрсатишни тўхтатади, деган Жо Байден.
Рафах чегара пунктида гуманитар ёрдам юкланган 200 дан ортиқ юк машинаси ҳозир кириш учун рухсат берилиши кутиб тургани айтилган.
Буюк Британия бош вазири Риши Сунак ҳам пайшанба куни Нетаньяху билан музокаралар ўтказиш учун Исроилга келди.
«Аввало, мен Исроил халқи билан бирдамлигимни билдириш учун келдим. Сизлар даҳшатли террорчилик актини бошдан кечирдингиз ва шуни билишингизни истайманки, Буюк Британия ва мен сиз билан биргамиз», — деди Сунак исроиллик журналистларга.
Ҳалок бўлганлар сони
Томонлар берган сўнгги маълумотларга кўра, ҲАМАСнинг Исроилга ҳужумлари оқибатида 1400 нафардан ортиқ одам ўлган. Исроилнинг Ғазога уюштирган ҳужумларида 3500 нафарга яқин фаластинлик ҳалок бўлган.
