Икки террорчи Анқарада Туркия Ички ишлар вазирлиги Хавфсизлик бош бошқармаси дарвозаси олдида портлаш уюштирди. Бу ҳақда «Анадолу» агентлиги буни теракт сифатида баҳолаган Туркия ички ишлар вазири Али Ерликаяга таяниб хабар берди.
Унинг сўзларига кўра, ҳодиса маҳаллий вақт билан 09:30 атрофида содир бўлган.
Вазирнинг айтишича, икки полициячи енгил жароҳат олган.
«Тахминан 09:30 да ИИВ Хавфсизлик бош бошқармасининг кириш эшиги томон енгил тижорат автомобилида келган икки нафар террорчи портлаш содир этди. Террорчилардан бири ўзини портлатиб юборди, иккинчиси эса зарарсизлантирилди. Ўқ отилиши натижасида икки нафар полициячимиз енгил тан жароҳати олди. Қаҳрамонларимизга тезроқ соғайиб кетишларини тилайман», — деб ёзди у Facebook -саҳифасида.
Али Ерликая Туркия хавфсизлик кучлари «терроризмга қарши муросасиз курашни давом эттиришини» таъкидлади.
TRT телеканалининг хабар беришича, террорчилар вазирлик биносига кираверишгача борган, улардан бири ўзидаги портловчи моддани ишга туширган. Вазирлик хавфсизлиги ходимлари ҳужумчиларга қарата ўт очган. Қисқа муддатли отишма содир бўлган ва иккинчи террорчи зарарсизлантирилган.
Теракт портлаш жойи яқинида жойлашган Туркия парламенти ўз ишини қайта бошлаган куни содир бўлган. Президент Ражаб Тоййиб Эрдоған у ерда соат 14:00 да нутқ сўзлаши керак эди.
