Шавкат Мирзиёев 13 сентябрь куни «Халқаро шартномани тасдиқлаш тўғрисида»ги қарорни қабул қилди, деб хабар бермоқда Адлия вазирлиги.
Ҳужжатга кўра, Ўзбекистон ва Қатар ҳукуматлари ўртасида олий таълим ва илмий тадқиқотлар соҳасида ҳамкорлик тўғрисидаги битим тасдиқланди.
Битим 2023 йил 6 июнда Қатар амири Самарқанд шаҳрига ташриф буюрганда имзоланганди. Олий таълим, фан ва инновациялар вазирлиги халқаро шартномани амалга ошириш учун масъул бўлган ваколатли орган этиб белгиланди.
Вазирлар Маҳкамаси ҳамда тегишли вазирлик ва идораларнинг раҳбарлари ушбу халқаро шартнома кучга кирганидан кейин унинг қоидалари амалга оширилиши устидан белгиланган тартибда назоратни таъминлайди.
Қатар билан муносабатлар
Сўнгги пайтларда Ўзбекистон ва Қатар ўртасида ҳамкорлик алоқалари мустаҳкамланмоқда. Жумладан, 2023 йилнинг май ойида Тошкентда Қатар элчихонаси очилган. Қатар дипломатик миссиясининг очилиши икки томонлама муносабатлар тарихида янги саҳифа очиши, уларнинг амалий мазмун билан бойишига хизмат қилишига ишонч билдирилган.
Июнь ойида эса Қатар фуқаролари учун 30 кунлик муддатга визасиз режим жорий қилинган.
Ўзбекистон президенти июнь ойида Самарқандда Қатар амири билан бўлиб ўтган музокараларда икки давлат ўртасидаги муносабатлар «кенг қамровли шериклик» даражасига чиқишига ишонч билдирган. Давлатлар раҳбарлари ўзаро савдо кўрсаткичларини оширишга тайёр эканини маълум қилган. Ўшанда 15 та икки томонлама ҳужжат имзоланган.
Август ойига келиб, Ўзбекистондан Қатарга тўғридан-тўғри авиарейслар йўлга қўйилган.
