Ўзбекистон ҳукумати Тошкент ва Янги Тошкентни иккита метро линияси билан боғлашни режалаштирмоқда. Бу ҳақда қурилиш ва уй-жой коммунал хўжалиги вазири ўринбосари, Янги Тошкент шаҳрини барпо этиш дирекцияси директори Давронжон Одилов «Ўзбекистон 24» телеканалининг «Менимча» кўрсатувидаги интервьюсида маълум қилди.
Унга кўра, Янги Тошкентнинг транспорт-логистика масалаларига Германия, Жанубий Корея ва Туркия компаниялари жалб этилган.
«Авваламбор, Тошкентнинг транспорт модели яратилди, у макромодель дейилади. Янги шаҳарга иккита метро линияси — „Буюк Ипак йўли“ ва „Дўстлик“ бекатлари орқали боғланилади. Янги шаҳарга метрода 30−35 дақиқада етиб келиш имконияти яратилади… Автомобилда келишга эҳтиёж қолмайди», — дейди у президентга қилган Янги Тошкентнинг бош режаси лойиҳаси тақдимотидан сўнг.
Эслатиб ўтамиз, аввалроқ Чилонзор метро линиясини ТТЗ массивигача кенгайтириш режалаштирилгани ҳақида хабар берилганди.
Катталаштириш учун расм устига босинг.
Тақдимотдан олинган кадрларга кўра, янги шаҳарда метрога боғланадиган трамвай тармоғи ҳам бўлади.
«Газета.uz» ўтган йилнинг ноябрь ойида Alstom Тошкентда трамвай линияларини қуриши ҳақида ёзганди. Ўшанда 9,1 км узунликдаги линияларнинг нархи 167,4 миллион еврога баҳоланган. Битим Парижда Ўзбекистон президентининг ташрифи доирасида имзоланган.
Транспорт вазири Илҳом Маҳкамов қурилиш ишлари билан Alstom шуғулланишини тасдиқлаган, бироқ линияларнинг йўналишлари ҳали аниқ эмаслигини билдирган. Тошкентни бўлажак «Янги Тошкент» шаҳри билан боғловчи Янги Ўзбекистон кўчаси истиқболли йўналишлардан бири бўлиши мумкинлиги келтирилган. Бунда, тахминларга кўра, линия «Дўстлик» метро бекатидан бошлаб, Янги Ўзбекистон кўчаси бўйлаб ўтади.
Транспорт бошқармаси бошлиғи Анвар Жўраевнинг сўзларига кўра, иккита — ТТЗ ҳамда «Ипподром»дан Шимолий вокзалгача бўлган йўналиш доирасида таклифлар тайёрланган.
