Ўзбекистон ва Франция 22 ноябрь куни Парижда Тошкентнинг трамвай тизими лойиҳасини амалга ошириш бўйича «йўл харитаси»ни имзолади, дея хабар бермоқда «Газета.uz» мухбири.
Ҳужжат Ўзбекистон бош вазири ўринбосари — инвестициялар ва ташқи савдо вазири Жамшид Ходжаев ҳамда Франция ташқи савдо, иқтисодий жозибадорлик ва хориждаги францияликлар ишлари бўйича вазири Оливье Бешт томонидан имзоланган.
Жамшид Ходжаев ва Оливье Бешт. Фото: Шуҳрат Латипов / «Газета.uz»
Инвестициявий келишувга мувофиқ, Франциянинг Alstom машинасозлик компанияси 9,1 километрлик трамвай линияларини қуради. Кунлик йўловчи ташиш ҳажми 78 минг кишини ташкил этиши кутилмоқда. Қурилиш ишларини 2024 йилнинг биринчи чорагида бошлаш режалаштирилган. Лойиҳа қиймати 167,4 млн еврога баҳоланмоқда.
Тошкент шаҳри ҳокими ўринбосари — инвестициялар ва ташқи савдо бошқармаси бошлиғи Шароф Раҳмонов «Газета.uz» мухбири билан суҳбатда Ўзбекистон ушбу лойиҳани Alstom билан ҳамкорликда сўнгги 3−4 ой давомида ишлаб чиққанини маълум қилди.
«Раҳбариятимиз томонидан ушбу лойиҳанинг амалга оширилишини тезлаштириш бўйича кўрсатма берилган. Ҳозир биз франциялик ҳамкорларимиз билан техник-иқтисодий асос (ТИА) ва лойиҳанинг ўзини тайёрлаш бўйича ишларни бошлаб юбордик», — деди у. Раҳмоновнинг қўшимча қилишича, трамвайларни тендер асосида танлаб олиш режалаштирилган.
Транспорт вазири Илҳом Маҳкамов қурилиш ишлари билан Alstom шуғулланишини тасдиқлади, бироқ линияларнинг йўналишлари ҳали аниқ эмаслигини билдирди. Тошкентни бўлажак «Янги Тошкент» шаҳри билан боғловчи Янги Ўзбекистон кўчаси истиқболли йўналишлардан бири бўлиши мумкин. Бунда, тахминларга кўра, линия «Дўстлик» метро бекатидан бошлаб, Янги Ўзбекистон кўчаси бўйлаб ўтади.
Транспот бошқармаси бошлиғи Анвар Жўраев ёзда қилган чиқишларининг бирида трамвайнинг иккита йўналиши бўйича таклифлар тайёрлангани, улардан биринчиси ТТЗдан Шимолий вокзалгача, иккинчиси эса Шимолий вокзалдан Отчопаргача давом этиши мумкинлигини маълум қилган эди.
«Газета.uz» Тошкентда трамвай қатновларини тугатиш тўғрисидаги қарорни қабул қилишда шошма-шошарликка ва хатога йўл қўйилганига бир неча бор эътиборни қаратган. Расмийлар трамвайни самарасиз деб атагани ҳолда траспорт муаммолари (йўлларнинг тирбандлиги)ни эса кўчаларни кенгайтириш, янги йўл ўтказгичлар ва метрополитен линияларини қуриш орқали ҳал қилишни режалаштирган. Оқибатда шаҳарда жамоат транспорти билан боғлиқ вазият оғирлашишда давом этди.
