Хитой Ўзбекистонга янги темирйўл қатновини йўлга қўйди, дея хабар бермоқда Spot нашри «Синьхуа» агентлигига таяниб.
China Railway Beijing Group компаниясига қарашли юк поезди 29 август куни Хебей провинцияси Чжанжиаку шаҳридан Тошкентга жўнаб кетди. 14 та контейнер платформасидан иборат поездда автомобиль эҳтиёт қисмлари, маиший техника ва тўқимачилик маҳсулотлари олиб кетилган.
Поезд йўналиши Қозоғистон билан чегарадаги Хоргос қуруқ порти орқали ўтади. Тахминан 15 кун ичида Ўзбекистон пойтахтига етиб бориши кутилмоқда.
Компания янги йўналиш минтақада юк ташишни ривожлантиришда муҳим қадам бўлишини таъкидламоқда. Шунингдек, Чжанжиаку шаҳридаги темирйўл ва автомобиль йўллари туташуви негизида янги мультимодал логистика марказини яратиш режалаштирилган.
Эслатиб ўтамиз, июнь ойида мамлакатнинг Сиямен портидан Сергели станциясига Эрон орқали биринчи контейнер поезди ҳаракати йўлга қўйилганди. Июль ойи бошида эса эса Хитойдан Лангфан-Қашқар-Иркештом-Ош-Тошкент янги мультимодал йўналишида контейнерли блок-поезди жўнатилганди. Бутун йўлнинг масофаси тахминан 6000 километрни ташкил этади.
Апрель ойида Қирғизистон Транспорт вазирлиги вакили Нурмат Мусабеков Хитойдан Қирғизистон ва Ўзбекистон орқали ўтадиган янги темирйўл Европага юк ташиш муддатини бир ҳафтага қисқартиришини маълум қилганди.
