Ўзбекистон президенти Шавкат Мирзиёев сешанба куни реконструкциядан чиққан Республика болалар кутубхонасига ташриф буюриб, болалар билан китобхонликнинг афзалликлари, замонавий мобил қурилмаларнинг ижобий ва салбий томонлари ҳақида суҳбатлашди. Бу бўйича видеоролик давлат раҳбари матбуот хизмати томонидан эълон қилинди.
Шавкат Мирзиёев уч ёшли набираси хитой тилини ўрганаётганини айтди. «Тил билган одам бутун дунёни билади. Тил билганга дунё эшиклари очиқ, дейди ота-боболаримиз. Шунинг учун дунё эшиклари сизларга очиқ бўлсин», — деди у.
«Умид қиламанки, бу кутубхона сизларга ёқди, бу ерга кўпроқ келиб, китоб билан дўст бўлсангиз, сизлардан жуда миннатдор бўламан», — деди президент.
«Менинг невараларим кўп. Уларгаям айтаман: „Кўпроқ китоб ўқисангиз, яхши бўлади“. Лекин сизларни (болалар — таҳр.) ҳозир энг қизиқтирган нарса фақат телефон. Бу менинг ёмон кўрган нарсам (кулади). Минг афсус, мен улар телефонда ўтирса, ёмон кўраман буни», — деди Шавкат Мирзиёев.
«Лекин улар: „Бобожон, сиз ёмон кўрсангиз ҳам, дунё телефоннинг ичида. Мен дунё воқеаларини телефондан билиб олишим керак“, дейди. Шунинг учун мен яхши ёки ёмон кўрганим эмас, бу замоннинг ҳозирги талаби. Шу замонга муносиб [бўлмоқчи] бўлсак, телефоннинг ичида бўлишимиз керак экан», — дея хулоса қилди у.
«Бугун бир-биримиз билан танишдик. Фарзандларини кутубхонага юбораётган ота-оналарга ўз номимдан раҳмат айтаман. Келишдикми? Соғ бўлинг!» дея президент болалар билан хайрлашди.
«Газета.uz» таъмирланган кутубхонанинг ички қисми акс этган суратларни эълон қилган. Шунингдек, реконструкция лойиҳаси муаллифи, Санкт-Петербургдаги Ludi Architects архитектура бюроси раҳбари Любовь Леонтьева билан интервью эълон қилинган.
31 август куни кутубхонада очиқ эшиклар куни бўлиб ўтади. Бир қатор маҳорат дарслари ва маърузалар ўтказилиши режалаштирилган.
