Париждаги электросамокатларни ижарага берувчи компаниялар ўз транспорт воситаларини кўчалардан йиғиштира бошлади, дея хабар бермоқда Le Figaro.
Шаҳар ҳокимияти апрель ойида бу масала юзасидан рефендум ўтказди. Унда иштирок этганларнинг аксарияти электросамокатларни ижарага берувчи компаниялар билан шартномани узайтирмасликни билдирган ва натижада бу фаолият билан шуғулланувчи Dott, Lime ва Tier компаниялари билан шартномалар янгиланмади.
Амалдаги шартнома муддати 1 сентябрда тугайди, бу санагача шаҳар кўчаларидан 15 мингта электросамокат йиғиб олиниши керак. Tier Mobility компанияси кунига 450 та транспорт воситасини кўчалардан йиғиб олаётганини, шартнома муддати тугашига яқин қолганда кунига 750 та электросамокатни йиғиштириб олишини маълум қилди.
Мазкур учта компания транспорт воситаларида техник хизмат ва профилактика ишларини ўтказиганидан кейин уларни Франциянинг бошқа шаҳарлари, шунингдек, Германия, Польша, Бельгия, Италия ва Исроилга жўнатмоқчи.
Эндиликда бу компаниялар Парижда электросамокатлар ўрнига электровелосипедлар ижараси билан шуғулланади. Компания вакилларининг айтишича, улар бу транспорт тури ижарасига талаб ортиб бораётганини кузатмоқда.
Маълумот ўрнида, Анн Идальго бошчилигидаги Париж мэрияси апрель ойида шаҳарда электросамокатларни ижарага берувчи компаниялар билан шартномани янгилаш масаласи бўйича референдум ўтказганди. Иштирокчиларнинг аксарияти референдумда қарши овоз берган. Жараёнда шаҳар аҳолисининг 8 фоизи иштирок этгани учун электросамокатларни ижарага берувчи компаниялар бу овоз бериш аҳолининг фикрини етарлича акс эттирмаслигини (репрезентатив эмас) таъкидламоқда.
