АҚШ Эрондан санкцияларни юмшатиш эвазига Россияга Украинадаги урушда фойдаланаётган ҳужум дронларини етказиб беришни тўхтатишга ҳаракат қилмоқда, деб ёзди Financial Times америкалик ва эрон расмийлари ўртасидаги манбаларга таяниб.
Бу масала АҚШ президенти Жо Байден маъмурияти томонидан Қатар ва Уммондаги Эрон вакиллари билан билвосита музокараларда икки марта кўтарилган. Бундан ташқари, АҚШ Эрондан Россияга дронлар учун эҳтиёт қисмларни юборишни ҳам тўхтатишни истайди.
Музокарачилар иштироқчилари икки томонлама муносабатларда деэскалацияга эришишига умид қилмоқда. Бунинг учун Эрон ҳам уранни 60 фоиздан ортиқ бойитишдан воз кечиши, Атом энергияси бўйича халқаро агентлик билан ҳамкорликни яхшилаши ва америкаликларга ҳужум қилмаслик мажбуриятини олиши керак, деди манбалар нашрга.
Бунинг эвазига Вашингтон Эронга қарши янги санкцияларни (инсон ҳуқуқлари билан боғлиқ бўлганлар бундан мустасно) жорий қилмайди ва нефтга нисбатан аллақачон киритилган чекловларни «қатъий назорат қилмайди».
Нашрнинг таъкидлашича, Эрон АҚШни Европадаги иттифоқчиларини мамлакатга босимни юмшатишга кўндиришга ҳам ҳаракат қилмоқда. Теҳрон Эроннинг баллистик ракета дастурини чекловчи ядровий келишув қоидалари октябрь ойида тугаши ортидан Буюк Британия, Германия ва Франция янги санкциялар жорий қилиши мумкинлигидан хавотирда, деди Эрон расмийси.
Россия армияси мунтазам равишда Украина шаҳарларини Эроннинг Shahed-136/131 ҳужум дронлари билан ўққа тутмоқда. 2022 йил ноябрида Эрон расмийлари босқиндан бир неча ой муқаддам Россияга «оз сонли» дронларни етказиб берганини тан олган, бироқ етказиб беришда давом этаётганини инкор этган эди.
