Санитария-эпидемиологик осойишталик ва жамоат саломатлиги хизмати Ўзбекистонда коронавирус инфекцияси бўйича эпидемик вазият барқарор эканини маълум қилди.
Telegram`даги Davletovuz каналида «Коронавирус ҳеч қаерга кетгани йўқ» номли пост эълон қилинганди. Унда ижтимоий тармоқларда аҳоли ўртасида коронавирус яна фаоллашиб қолгани (қуйидаги скриншотда бир аёл яқинда турмуш ўртоғи билан Зангиота касалхонасига коронавирус билан касалланиб боргани ва у ерда яхши шароит ҳозирланганини ёзган) ҳақида сўз бораётгани айтилган.
Санитария-эпидемиология қўмитасининг билдиришича, республикада 25 июль ҳолатига коронавирус билан касалланганлар сони 255 193 нафарни ташкил этиб, улардан 253 235 нафари (99 фоиз) соғайган.
«Бугунги кунда республикада коронавирус инфекцияси бўйича вазият барқарор», — дея таъкидлади қўмита.
Хизматнинг қўшимча қилишича, коронавирус ва ўткир респиратор инфекцияларнинг микс-инфекция касаллиги сифатида айнан эмланмаган аҳоли ҳамда сурункали касалликлари мавжуд бўлган фуқаролар ўртасида қайд этилиши кузатилмоқда.
«Касалланиш бутун дунёда чекингани билан, йўқ бўлиб кетгани йўқ, Жаҳон соғлиқни сақлаш ташкилоти (ЖССТ) бош директори томонидан 4 май куни ўтказилган йиғилишда коронавирус COVID-19 пандемиясини жамоат саломатлигига хавф солмайдиган даражадалиги эълон қилинган, шунинг билан бирга касалланишдан ҳимояланиш чоралари давом эттирилиши лозимлигини таъкидлаган», — дейилади хабарда.
26 июль ҳолатига Ўзбекистонда жами 80 миллион 258 минг доза вакцинадан фойдаланилган.
Пандемия бошланган бери 27 июль ҳолатига дунёда 692,1 млн нафардан ортиқ беморларда коронавирус инфекцияси аниқланган ва улардан 6,9 млн нафари (0,9 фоиз) вафот этган.
