Aziya Invest Favorit қурилиш компаниясидан уй сотиб олган фуқаролар 21 июль куни Ўзбекистон бош вазири Абдулла Арипов билан учрашди. Ижтимоий тармоқларда «Пахтакор» стадиони яқинида бўлиб ўтган учрашув видеоси тарқалди.
Аввал хабар берганимиздек, 1000 дан ортиқ мижоз Aziya Invest Favorit томонидан қурилаётган ва қуриб битказилаётган 8 та уйдан квартира сотиб олган. Қурилиш компанияси банклардан кредит олиш учун эгаларининг квартираларини гаровга қўйган, бироқ кейинроқ кредит тўланмагани учун банклар уй-жойни тортиб олган. Аҳолига етказилган зарар 300 млрд сўмдан (25,9 млн долларга яқин) ошиши мумкин.
Мазкур ҳолат юзасидан Яшнобод вилояти прокуратураси томонидан ЖКнинг 168-моддаси 4-қисми (ўта йирик миқдордаги фирибгарлик) билан жиноят иши қўзғатилиб, тергов ҳаракатлари олиб борилмоқда.
Ҳукумат раҳбари 1091 нафар акциядорнинг муаммосини ҳал этиш учун бош вазир ўринбосари Ачилбай Раматов бошчилигида ҳукумат комиссияси тузилганини маълум қилди.
«Бундай нарсани олдин гаплашиб олайлик. Худога минг марта шукур, эркин замонда гаплашяпмиз. Ҳеч қайси бирингизга давлат: „Мана шу ердан уй олинглар“, деб қўлларингдан етаклаб олиб боргани йўқ, тўғрими? У одам ўзи олиб қиляпти, тадбиркор. Ўғримас, ҳали қочиб кетгани йўқ. Биз уни қамаганимиз йўқ. Агар ҳозир сизлар тўпалон қиладиган бўлсангизлар, биз уни қамаб қўямиз, у пулини тўлай олмайди. Уйни ҳам битқазмайди. Сизларга уй керак, тўғрими?» — деди бош вазир.
Абдулла Арипов йиғилган фуқароларга барчаси қонуний равишда ҳал қилиб берилишига ваъда берди.
«Ҳурматли президентимиз юбордилар. Чунки сизларнинг орқангизда нафақат биз, бу киши шаҳар прокурори, мана — қурилиш вазирининг биринчи ўринбосари, бошқалар турибди, президент турибди! Шунинг учун қўрқманглар. Мен сизлар билан алоҳида йиғилиб, битта-битта ўтириб, ҳаммасини ҳал қиламиз», — деди ҳукумат раҳбари.
Бош вазирнинг таъкидлашича, пулни қайтариш ёки уй-жой билан таъминлаш имкониятлари кўриб чиқилмоқда. Аҳоли шу заҳоти пул керак эмаслигини эътироз билдирди. Биз аҳолининг инфляциядан хавотирда экани, чунки қурилиш бошланган вақтларда квартираларнинг ҳар квадрат метри 3,5−4 млн сўм бўлгани, сўнгги тўрт йилда эса уй-жой нархи сезиларли даражада ошгани учун маблағларни қайтаришни истамаётгани ҳақида ёзган эдик.
Абдулла Арипов 100 фоиз тўловни амалга оширганлар уй-жой билан таъминланишини таъкидлади, «улар хавотирга тушмасин». Аҳолидан бири 50% тўлаганлар билан нима бўлишини сўради. Ҳукумат раҳбари пуллар унга қайтарилишини айтди.
«Қўшимча тўлов масаласи кўрилади. Агар қурилиш материаллари қиммат бўлган, нархи индексация бўлган бўлса, унда индексланган нарх тўлайсизлар», — деди у. Унинг бу сўзлари яна норозиликларни келтириб чиқарди.
Бош вазир беш-олтита қурувчиларни уй-жой қуришга алоҳида жалб этиш режалаштирилаётганини таъкидлади. «Ҳеч кимга сизлардан бир сўм фойда қилдиртирмаймиз. Мен ваъда бераман. У қурувчига бошқачасига компенсация қилдириб бераман. Қарор чиқариб бераман. У қарорни ҳам ўзларингга ўқиб бераман», — деди бош вазир.
Яна бир аёл: «Ўзимиз келдик, ўзимиз тўладик, лекин тушунинг, бу давлатга ишонч. Мана, мен Россия фуқаросиман, у ерда мени алдашаётганини билардим. Ўзбекистон ҳеч қачон алдамаслигини, чув туширмаслигини билардим».
Бунга жавобан Абдулла Орипов: «Кечирасиз мени, ҳамма жойда чув туширишади», — деди.
Ҳукумат раҳбари унга президент томонидан «халқимнинг муаммоларини ҳал қилиш» топшириғи берилганини яна бир бор такрорлади. Унинг сўзларига кўра, қолган уйларнинг қурилишини якунлаш 2024 йил охирига мўлжалланган.
Бош вазир қурилиш вазирининг биринчи ўринбосари Даврон Одилов билан икки ҳафта давомида пудратчилар ва қурилиш майдончаларини танлаш масаласини муҳокама қилишини, сўнг август ойи бошида яна ҳиссадорлар билан учрашиб, муаммони ҳал этиш вариантларини таклиф қилишини айтди.
Учрашув сўнгида ҳукумат раҳбари қўлларини дуога очиб, президентнинг ҳаққига дуо қилди: «Ҳаммамизнинг бахтимизга хурматли президентимиз омон бўлсинлар, бизнинг ҳаётимизни, соғлиғимизни ўйлайдиган. Дунё тургунча турсинлар».
