Тимоти Смарт Буюк Британиянинг Ўзбекистондаги янги элчиси этиб тайинланди, деб хабар бермоқда Британия ҳукумати расмий сайти.
Тимоти Смарт республикадаги дипломатик миссиясини якунлаётган Тим Торлоу ўрнига жорий йилнинг август ойида Ўзбекистонда иш бошлайди.
Янги элчи 1974 йилда туғилган. Бристоль ва Кембриж университетларини тамомлаган.
Бу лавозимга тайинланишидан олдин (2018−2022 йиллар) Буюк Британия Ташқи ишлар вазирлигининг Шарқий Ўрта денгизи бўлими бошлиғи бўлган. Шунингдек, 2012−2017 йилларда Мадагаскарда элчи вазифасини бажарган.
Аввалроқ Британия собиқ элчиси Тим Торлоу «Газета.uz»га берган интервьюсида (инглиз тилида) ислоҳотлар, сиёсий муаммолар, сўз эркинлигининг мамлакат тараққиётидаги ўрни ҳақида гапирганди. У ўз ўринбосари нима учун ўзбек тилини ўрганаётгани ва РФнинг Украинага қарши урушида Ўзбекистон позицияси нимадан дарак беришига ҳам тўхталган.
