Соғлиқни сақлаш вазирлиги ижтимоий тармоқларда тарқалган Тошкент вилоятининг Нурафшон шаҳрида ҳомиладор аёл чақалоғи билан вафот этгани ҳақидаги хабар юзасидан муносабат билдирди.
Унда айтилишича, 14 июль соат 06:45 да Нурафшон шаҳар тиббиёт бирлашмасининг туғуруқ бўлимига Ўртачирчиқ тумани «Гулобод» МФЙ да яшовчи 1993 йил 28 февралда туғилган фуқаро М.Д. мурожаат қилган.
«Бемор муассасага олиб келинганида аҳволи ўта оғир, териси рангпар, совуқ тер босган, артериал қон босими 70/40 мм симоб устунига тенг, тана ҳарорати 39,5 даража, тананинг шиллиқ қаватлари кўкимтир рангда, карахт ва саволларга аниқ жавоб бера олмайдиган ҳолатда бўлган», — дейилади хабарда.
Вазирлик маълумотига кўра, қабул вақтида унга «Ҳомиладорлик-2″, 38 ҳафта туғуруқ, сепсис. I-II даражали септик шок» дастлабки ташхиси қўйилиб, зудлик билан реанимация бўлимига ётқизилган. Шундан сўнг навбатчи бригада акушер-гинекологлари ҳамда анестезиолог-реаниматолог томонидан барча зарур реанимацион муолажалар амалга оширишга киришилган.
Дастлаб икки томонлама периферик вена, кейинчалик марказий вена катетерланиб, марказий веноз босим паст бўлгани учун шокка қарши, юрак-қон томир, нафас олиш тизимини қўллаб-қувватловчи тезкор чора-тадбирлар ўтказилган.
Шунингдек, бемор ўпканинг сунъий вентиляциясига ўтказилган. Бироқ марказий вена орқали бажарилган массив инфузион муолажалар ва жадал реанимацион терапияга қарамай, унинг гемодинамикаси тикланмаган.
Оқибатда 14 июль соат 07:30 да беморда клиник ўлим ҳолати қайд этилган. «Навбатчи анестезиолог-реаниматолог шифокорлар томонидан юрак-ўпка реанимацияси 40 дақиқа давомида олиб борилди, лекин юрак фаолияти тикланмади. Оқибатда соат 08:10 да беморда биологик ўлим кузатилди».
Ушбу ҳолат юзасидан суд-тиббий экспертизаси тайинланган.
