Россиялик хонанда Григорий Лепснинг 23 октябрь куни Тошкентдаги Халқлар дўстлиги саройида бўлиб ўтиши керак бўлган концерти бекор қилинди. Бу ҳақда ташкилотчиларга таяниб, Afisha.uz хабар берди.
Кейинроқ Ўзбекистон Маданият ва туризм вазирлиги концерт «баъзи техник сабабларга кўра қолдирилганини» маълум қилди.
Сотиб олинган чипталар қайтарилади.
Аввалроқ «Газета.uz» Ўзбекистондаги бир гуруҳ фаоллар Россиянинг Украинага қарши ҳарбий ҳаракатларини фаол қўллаб-қувватлаётган санъаткорнинг чиқишларини бекор қилишни талаб қилгани ҳақида ёзган эди.
Бунга жавобан Маданият ва туризм вазири ўринбосари Баҳодир Аҳмедов Ўзбекистонда санъат учун ҳеч қандай тўсиқ йўқлигини айтди. «Келяпти, санъатини намойиш қиляпти, кетяпти», — деди у санъаткорлар ҳақида.
Вазир ўринбосари, шунингдек, Лепснинг ҳарбий амалиётларни молиялаштиргани ҳақидаги хабарларга шубҳа билдирган, ваҳоланки 3 июль куни қўшиқчи ўз ваъдасини бажаргани ва Украинадаги уруш зонасида «Леопард» танкини яксон қилган россиялик аскарга 1 млн рубль тўлаганини айтганди.
Пайшанба куни Григорий Лепснинг Қирғизистоннинг 2 августга Чолпон-Ата шаҳрида бўлиб ўтиши режалаштирилган концерти бекор қилингани маълум бўлди. Бунга жамоатчилик норозилиги сабаб бўлди.
Июнь ойида Григорий Лепснинг Қозоғистондаги концерти ҳам жамоатчилик норозилиги туфайли бекор қилинган эди.
