Costa Coffee халқаро қаҳвахоналар тармоғи Ўзбекистон бозорига киришга ҳозирлик кўрмоқда. Бу ҳақда Spot компаниянинг маҳаллий бўлинмасининг Telegram-каналига таяниб хабар берди.
Канал 19 июнь куни ташкил этилган ва икки кундан сўнг унда яқин орада очилиши ҳақидаги биринчи пост эълон қилинган. 26 июнь куни эса компания Instagram профилини ҳам ишга туширди.
Costa Coffee`нинг биринчи манзили кутилганидек, тез орада Тошкентда очилади. Компания ҳозирча жойни эълон қилмаган. Ҳозирда Facebook аккаунтида келтирилган манзил: Маҳатма Ганди кўчаси, 14-уй бўлиб, у ерда савдо маркази жойлашган.
Қаҳвахоналар тармоғи ўз тарихини 1971 йилда ака-ука Сержио ва Бруно Коста Лондонда қаҳвахона очганидан буён ҳисоблаб келади. 1978 йилда компания кенгайишни бошлади ва уч йилдан сўнг Британия пойтахтида Costa бренди остидаги биринчи қаҳвахона иш бошлади.
Mocha Italia компаниянинг ўзига хос қаҳва навига айланди. Компания экологияга эътиборли эканини тасдиқлайдиган Rainforest Alliance сертификатларига эга бўлган етказиб берувчилардан қаҳва доначаларини сотиб олади.
Ҳозирда Costa Coffee тармоғи 44 мамлакатда 4000 дан ортиқ шохобчаларга эга, уларнинг аксарияти франчайзинг асосида фаолият кўрсатади. Масалан, Қозоғистонда Олмаота ва Остонада қаҳвахоналар бор. Компания, шунингдек, қаҳва доначалари ва бошқа ингредиентларни бепул етказиб беришни ўз ичига олган Costa Express қаҳва машиналарини ўрнатишни таклиф қилади.
Эслатиб ўтамиз, аввалроқ Spot Американинг Subway ресторанлар ҳамда Cinnabon қаҳвахонаси Тошкентда франчайзинг очишга ҳозирлик кўраётгани ҳақида ёзган эди.
