Россия президенти Владимир Путин шанба куни Ўзбекистон президенти Шавкат Мирзиёев билан телефон орқали мулоқот қилди.
«Президент Владимир Путин давлатимиз раҳбарига Россиядаги вазият тўғрисида маълумот берди», — дейилади Ўзбекистон президенти матбуот хизмати хабарида.
Аввалроқ Вагнер хусусий ҳарбий компанияси раҳбари Евгений Пригожин Россия Мудофаа вазирлигини ХҲК лагерига ракета ҳужумида айблаб, Мудофаа вазирлиги раҳбариятига қарши исён ва Москвага юришни эълон қилгани ҳақида ёзгандик. ХҲК жангчилари Ростов-Дон шаҳрига кириб, ҳарбий ва маъмурий объектларни эгаллаб олган.
Владимир Путин телевидение орқали русларга мурожаат қилган, «ортдан пичоқ уриш» ва «хиёнат» ҳақида гапириб, исён ташкилотчилари «муқаррар жазога тортилишини» айтган. Москва, Москва вилояти ва бошқа вилоятларда антитеррор чоралари жорий этилган.
Шу куни Владимир Путин Қозоғистон ва Беларусь президентларига ҳам телефон қилди.
Қозоғистон президенти матбуот хизмати Қасим-Жомарт Тоқаев содир бўлаётган воқеаларни «Россиянинг ички иши» деб атаганини билдирди.
У Конституциявий тузум ва қонун устуворлиги мамлакатда ҳуқуқ-тартиботни таъминлашнинг ажралмас шарти, жамият хавфсизлиги ва унинг муваффақиятли ривожланишининг асоси эканини таъкидлаган.
«Владимир Путин Қозоғистонга Россиядаги мавжуд вазиятни тушунгани учун миннатдорлик билдирди», — дейилади хабарда.
Беларусь президенти матбуот хизмати берган қисқача хабарда таъкидланишича, эрталаб Александр Лукашенкога қўнғироқ қилган Россия президенти унга Россиядаги вазият ҳақида хабар берган.
Украина президенти Владимир Зеленский ҳам исён ва Владимир Путиннинг баёноти ҳақида гапирди.
«Ёмонлик йўлини танлаган ҳар бир киши ўзини ўзи йўқ қилади. Россия узоқ вақтдан бери ўзининг заифлиги ва ҳукмронлигидаги аҳмоқликни пропаганда билан ниқоблаб келган. Энди тартибсизлик шунчалик кўпайиб кетдики, уни ёлғон билан яшириб бўлмай қолди», — деди у.
«Россия ўз қўшинлари ва ёлланма аскарларини бизнинг тупроғимизда қанча узоқ ушлаб турса, кейинчалик бетартиблик, оғриқ ва муаммолар шунчалик кўп бўлади», — деди Зеленский.
