Шавкат Мирзиёев амалий ташриф билан Туркияда бўлади, деб хабар берди Ўзбекистон президенти матбуот хизмати.
Давлат раҳбари Режеп Таййип Эрдоғаннинг таклифига биноан 3 июнь куни Анқара шаҳрида Туркия президентининг лавозимга киришиши муносабати билан тадбирларда иштирок этади.
Ташкилотчиларнинг қайд этишича, инаугурация маросимида дунёнинг 70 дан зиёд мамлакатидан давлат ва ҳукумат раҳбарлари, расмий делегациялар ва олий мартабали меҳмонлар иштирок этиши кутилмоқда.
28 май куни президентлик сайловининг иккинчи босқичида овозларни дастлабки санаб чиқиш жараёнида Шавкат Мирзиёев Эрдоғанни сайловдаги «ишончли тарихий ғалабаси» билан табриклаган.
Эрдоған 52,18%, мухолифатнинг ягона номзоди Кемал Қиличдарўғли эса 47,82% овоз олган. Туркияда сайловчиларнинг 85,71 фоизи иштирок этган.
Эслатиб ўтамиз, Туркияда бўлиб ўтган президентлик сайловининг биринчи босқичи якунларига кўра Шавкат Мирзиёев Режеп Таййип Эрдоғанни жараён «муваффақиятли ўтгани» билан табриклаганди. Кейинроқ иккала асосий номзод ҳам керакли 50 фоиздан камроқ овоз тўплаган, улар орасидаги тафовут унчалик катта бўлмаган — мос равишда 49,52 фоиз ва 44,88 фоиз.
