Сўнгги ҳафталарда Тошкентнинг кўплаб туманларида йўл-қурилиш ишлари фаол тарзда олиб бориляпти: кўчалар бўйлаб қазилган траншеяларга бетон қувурлар ётқизилмоқда, у ерларда кабеллар кўриниб турибди.
Тошкент шаҳри ҳокими ўринбосари, пойтахт Уй-жой коммунал хизмат кўрсатиш бош бошқармаси бошлиғи Шоҳрух Раҳимжоновнинг «Газета.uz»га маълум қилишича, бу борадаги ишлар Ўзбекистон президентининг аҳолини энергия ресурслари билан таъминлаш бўйича мартдаги қарорига мувофиқ амалга оширилмоқда.
Ҳозирда умумий узунлиги 320 километр бўлган участкаларда ишлар олиб борилмоқда. Бу ерда 35−110 кВ паст кучланишли кабель ётқизилмоқда, — дейди Шоҳрух Раҳимжонов. Шунингдек, 5 та янги подстанция қурилиб, 4 та подстанция реконструкция қилинмоқда.
Амир Темур шоҳкўчаси
«Қишда кузатилган ҳолат такрорланмаслиги, ёзда оммавий узилишлар бўлмаслиги учун катта ишлар амалга оширилмоқда. Бундай кенг кўламли ишлар илгари қилинмаган», — деди Шоҳрух Раҳимжонов.
Лойиҳа доирасида 2023 йилда 903 километр паст кучланишли электр тармоқлари ва 228 та трансформатор пунктини янгилаш кўзда тутилган. Умуман олганда, 2025 йилгача бўлган дастур доирасида 2969 километр паст кучланишли линиялар ва 703 та трансформатор пунктларини янгилаш режалаштирилган.
Таъкидлаш жоизки, кўчаларнинг кўплаб участкаларида ёғингарчилик сувлари чиқиб кетишига мўлжалланган қувурлар ҳам янгиланмоқда. Мақсад — сўнгги йилларда кучли ёғингарчилик пайтида кўчаларда кузатилаётган кенг кўламли сув тошқинларининг олдини олиш.
«Газета.uz» ўқувчиларининг хабар беришича, айрим жойларда кўп йиллик дарахтлар яқинида ишлар олиб борилмоқда. Иш пайтида дарахтларнинг илдизлари очилиб, шикастланмоқда.
Анҳор канали бўйидаги илдизлари очилиб олган дарахт
Ўқувчилардан бири дарахтларнинг илдизига зарар етгани бўйича туман экология бўлимига мурожаат қилгани ҳақида ёзди. Инспектор ишчиларни қоидабузарлик учун жавобгарлик ҳақида огоҳлантирган.
Ўрмон хўжалиги илмий-тадқиқот институти илмий ходими Абдусалом Норматовнинг «Газета.uz»га таъкидлашича, дарахтлар учун хавф айланма экскаватор эмас, балки чўмичлиси билан қазилган тақдирдагина юзага келиши мумкин. Аммо кўп нарса ёғоч турига боғлиқ, деди мутахассис. Мисол учун, илдизи очилган терак хавф остида эмас. Дарахт илдизлари кесилган бўлса, уларни тиклаш учун кўпроқ суғориш керак. Аммо илдизнинг жиддий шикастланиши дарахтнинг нобуд бўлишига олиб келиши мумкин.
Ўзбекистон ландшафт санъати уюшмаси раҳбари Татьяна Югай ҳам дарахтлар хавф остида эмаслигини таъкидлади.
Эслатиб ўтамиз, ўтган йили Чилонзор кўчасини реконструкция қилиш жараёнида ишчилар 100 га яқин дарахтга зарар етказганди. Бош прокуратура томонидан дарахтларга қасддан шикаст етказиш факти бўйича жиноий иш қўзғатилган. Ўшанда туман ҳокими ва прокурори ишдан олинган, Тошкент шаҳрининг собиқ ҳокими ва шаҳар прокурорига қаттиқ ҳайфсан берилганди.
Аввалроқ Тошкент ботаника боғи дендрологи билан биргаликда оддий фуқаро қандай қилиб илдизлари шикастланган дарахтларни қутқариб қолиши мумкинлиги ҳақида кўрсатмалар тайёрлагандик.
