Ўзбекистон ва Россия рус газининг Қозоғистон орқали Ўзбекистонга транзитини муҳокама қилишда давом этмоқда. Бу ҳақда энергетика вазири Жўрабек Мирзамаҳмудов Energy Intelligence нашрига берган интервьюсида маълум қилди.

«„Йўл харитаси“ доирасида иш олиб боряпмиз, транзит имкониятларини ўрганяпмиз, техник масалаларни ҳал қиляпмиз. Техник масалалар ҳал этилиши билан биз тижорат шартларини муҳокама қиламиз», — деди у.

Апрель ойи охирида вазир «Газета.uz»га Россиядан Ўзбекистонга газни «Ўрта Осиё — Марказ» (CАC) газ қувури орқали етказиб бериш режалаштирилганини маълум қилганди. Унинг сўзларига кўра, аввалроқ етказиб бериш учун кўриб чиқилган бошқа — «Бухоро-Урал» газ қувури эскиргани сабабли мос келмаган.

Унинг таъкидлашича, томонлар газни тескари тартибда етказиб бериш учун компрессор станцияларини ўрнатиш ва таъмирлаш учун зарур бўлган харажатларни баҳоламоқда.

Energy Intelligence`нинг Ўзбекистон делегациясининг Пекинга ташрифи чоғида Хитойга газ етказиб бериш масаласи муҳокама қилинганми, деган саволига энергетика вазири: «Бизда шартномалар бор ва бу бўйича иш режалаштирилганидек давом этмоқда», — дея жавоб қайтарди.

Эслатиб ўтамиз, декабрь ойида Ўзбекистон Хитойга газ етказиб беришни тўхтатганини маълум қилганди, чунки у даврда ёнилғи ички бозорда тақчил бўлган. Етказиб бериш апрель ойига келиб тикланган. Шавкат Мирзиёев ва Хитой раиси Си Цзиньпин учрашуви якунлари бўйича келишилган режага мувофиқ «Хитой — Марказий Осиё» газ қувурининг барқарор ишлаши ва етказиб берилишини таъминлаш бўйича икки томон ҳамжиҳатликда иш олиб бориши қайд этилган.