Сингапурнинг Changi Airports International (CAI) компанияси янги Тошкент аэропорти қурилишининг техник-иқтисодий асосларини ишлаб чиқишда ёрдам беради, дея хабар қилди «Газета.uz» мухбири.
24 май куни Тошкентда Сингапур президенти Ҳалима Яқубнинг Ўзбекистонга ташрифи муносабати билан ўтказилган Ўзбекистон-Сингапур бизнес-форуми доирасида Uzbekistan Airports бошқаруви раиси Раъно Жўраева ва Changi Airports компанияси бош директори Южин Ган ўртасида келишувлар алмашинуви бўлиб ўтди.
Раъно Жўраева Тошкент Европа ва Осиёни боғлай оладиган халқаро хаб сифатида улкан экспорт салоҳиятига эга эканлиги, бироқ мавжуд аэропорт кўплаб чекловларга эгалиги, чунки пойтахт ривожланиб бориши билан у амалда шаҳар марказида бўлиб қолганини таъкидлади.
«Йўловчилар оқимини таҳлил қилиб, биз ўсиш жуда тез, деган хулосага келдик. Бугунги кунда, энг тиғиз соатларда терминаллар йўловчиларни деярли сиғдира олмайди ва самолётлар учун тўхташ жойлари етарли эмас. Шу боис янги аэропорт қуриш масаласи устида ишлаяпмиз. Маслаҳатчилар сифатида биз дунёдаги энг яхши аэропорт — Changi Airports International`ни таклиф қилдик. Уларнинг вазифаси халқаро хаб яратиш ва янги ҳаво бандаргоҳини қуришда энг замонавий аэропорт технологияларидан фойдаланишни ҳисобга олган ҳолда техник-иқтисодий асослашни ишлаб чиқишда бизга ёрдам беришдан иборатдир», — деди у.
Шунингдек, CAI вакиллари бир вақтнинг ўзида мавжуд аэропорт фаолиятини авиация ва ноавиацион фаолият нуқтаи назаридан оптималлаштириш бўйича консалтинг билан ҳам шуғулланади, — деди Uzbekistan Airports раҳбари.
2022 йилда мамлакат бош ҳаво бандаргоҳининг йўловчи ташиш ҳажми 5 млн йўловчини ташкил этган ҳолда пандемиядан олдинги даврдан ошиб кетди. Жорий йилда Uzbekistan Airports таҳлилчиларининг прогнозларига кўра, 8 млнга яқин йўловчи кутилмоқда.
Uzbekistan Airports матбуот хизматининг «Газета.uz»га маълум қилишича, шартнома имзолангандан сўнг томонлар тез орада икки йўналиш бўйича иш бошлайдилар: мавжуд аэропорт фаолиятини оптималлаштириш, жумладан, рақобатбардошлиги ва йўловчиларга хизмат кўрсатиш сифатини ошириш, илғор технологияларни жорий этиш ҳамда йўловчи ташиш ҳажмини ошириш, шунингдек, 2023−2024 йилларда янги Тошкент аэропорти лойиҳасининг техник-иқтисодий асослари устида. Аввал хабар қилинганимиздек, лойиҳа қиймати 1 млрд долларгача бўлиши мумкин.
«Changi Airports International компанияси Uzbekistan Airports билан ҳамкорлик қилишдан мамнун. Ўзбекистон Марказий Осиё минтақасидаги энг тез ривожланаётган бизнес ва туризм салоҳиятига эга мамлакатлардан биридир. Биз мавжуд Тошкент аэропортининг сиғими, иш стандартлари ва молиявий кўрсаткичларини оптималлаштириш, шунингдек, янги аэропортни ривожлантириш режаларини қўллаб-қувватлаш мақсадида аэропортни ривожлантириш ва бошқариш бўйича тажрибамиз билан ўртоқлашишни интиқлик билан кутамиз», — деди Changi Airports International бош директори Южин Ган.
Changi Airports International — халқаро аэропорти, Осиёдаги авиация хабларидан бири ва Сингапурдаги ягона аэропортдир. 1981 йилда очилганидан буён аэропорт авиация саноатида эталонга айланди ва 1987−2007 йиллар давомида 280 дан ортиқ мукофотларга сазовор бўлди. Аэропорт 2019 йилда 68,3 млн йўловчини рўйхатга олди ва халқаро йўловчилар сони бўйича дунёдаги еттинчи энг банд аэропортга айланди.
