Хитойнинг транспорт-логистика компаниялари Ўзбекистонда қўшма корхоналар ташкил этиб, логистика марказларини очади. Бу ҳақда транспорт вазири Илҳом Маҳкамов «Ўзбекистон 24» телеканалига берган интервьюсида маълум қилди.
Хитой томони «Ўзбекистон темир йўллари» акциядорлик жамияти ҳузуридаги «Ўзтемирйўлконтейнер» компанияси билан биргаликда қўшма корхона ташкил этиш, шунингдек, контейнерлаштирилган ташувларни режалаштирмоқда.
Эслатиб ўтамиз, Ўзбекистон президенти Шавкат Мирзиёев ва Хитой раиси Си Цзиньпиннинг 18 май куни Пекинда бўлиб ўтган учрашуви якунлари бўйича 41 та ҳужжат, жумладан, мультимодал логистика марказини ташкил этиш ҳамда «Ўзбекистон темир йўллари» локомотивлари паркини янгилаш ва модернизация қилиш тўғрисидаги битимлар имзоланганди.
Шунингдек, Илҳом Маҳкамов Ўзбекистон-Қирғизистон-Хитой темирйўли қурилишининг техник-иқтисодий асосларини ишлаб чиқиш якунланганини айтганди.
