Бухоро вилояти Қоракўл туманида 2009 йилда туғилган қизни янгаси бир неча бор эркаклар билан жинсий алоқа қилишга мажбурлагани айтилмоқда. Бу бўйича Xabar.uz нашрига мурожаат келиб тушган.

Нашрнинг ёзишича, отасидан алоҳида яшаб келган М.Б. исмли қизнинг 2021 йил май ойида онаси вафот этган. Шундан сўнг қиз онанинг васиятига кўра катта акаси билан (унинг 2 нафар акаси бор) яшаши керак бўлган. Аммо унинг Россияга ишлаш учун кетгани сабабли қиз кичик акаси ва янгаси билан Қоракўл туманидаги ижтимоий ётоқхонада яшай бошлаган.

«Мени кичик акам Б. ўз васийлигига олди. Кичик акам ҳар куни ишда. Эрта кетиб, кеч қайтарди. Мен эса янгам Ш.Қ. билан Қоракўл туманидаги ижтимоий ётоқхоналардан бирида яшардим. Янгам менга доимий тазйиқлар ўтказиб келарди. Урарди, сўкарди. Ҳатто бармоғимни ҳам уриб, синдирган. Мактабга боришимга ҳам рухсат бермас, кўп озорлар етказарди. Акамга ҳам мени ёмонлар, акам ҳам янгамнинг гапига кириб, мени уриб, сўкарди», — дейди қиз нашр билан суҳбатда.

Унинг айтишича, орадан бир-икки ой ўтгач, катта акаси Ш. Россиядан қайтган. Ўз розилиги билан васийлик катта акасига олиб берилган.

«Бундан катта акам ҳам, мен ҳам хурсанд эдик. Ш. акам ва унинг хотини менга меҳрибон эди. Улар билан 9 ой яшадим. Айни шу орада икки акам ўртасида менинг устимда ўзаро келишмовчилик бошланди. Кичик акам тезфеъл, ўзи Россияда бир бора қамалган. У бир қарашда одамни ўлдиришдан ҳам қайтмайдигандек туюлаверади менга. Шу боис қўрққанимдан яна кичик акам билан яшашимни билдирдим. Катта акам ҳайрон қолди, ҳатто мендан ранжиди ҳам. Аммо шундай қилмасам, кичик акам катта акамга жабр етказиши мумкин эди. Чунки биргина менга отам алимент тўларди. Бундан кичик янгам манфаатдор эди. Айнан шундан сўнг етти ухлаб, тушимга кирмаган қора кунлар бошланди қисматимда», — дейди қиз.

М.нинг сўзларига кўра, у иккинчи бор кичик акасининг васийлигига ўтган. 2022 йилнинг 6 сентябрь куни янга қизни кўчага алдаб олиб чиқиб, уни 29 ёшли йигитнинг машинасига мажбурлаб чиқарган. Йигит қизни туман марказидаги меҳмонхонага олиб бориб зўрлаган.

Қизнинг айтишича, Н. исмли 29 ёшли йигит қаршиликка қарамай, унга нисбатан куч ишлатган, урган, тепган ва ҳушидан кетказиб, жинсий зўравонлик қилган.

«Орадан қанча вақт ўтди, билмадим, оғир ва ўта қийин аҳволда ҳушимга келдим. Йиғладим, сиқтадим, уни айтиб беришимни, қилмиши жазосиз қолмаслигини айтдим. У эса: „Ғинг“ этсанг, ўзингга жабр. Аммо менга барибир, қўлингдан келганини қил. Орқамда одамим бор, ҳеч биринг ҳеч нима қилолмайсанлар. Янганг сени мендан олган қарзи эвазига алмаштирди, деди», — дея таъкидлайди қиз.

13 ёшли қиз бу воқеалар ҳақида янгасидан қўрққани, шунингдек, катта акаси хабар топса, аёлни [укасининг хотинини] ўлдириб қўйишидан қўрқиб, ҳеч кимга айтмаганини билдирди.

Унинг сўзларига кўра, бундай воқеа 2023 йилнинг 27 февраль куни яна такрорланган. Янгаси тахминан 23:00 атрофида ундан кечки арзон бозорга бирга бориб келишини сўраган. Манзилга етганда эса ичида 4 эркак бўлган машинага мажбуран чиқариб юборган.

Улар қизни чўлдаги кулбалардан бирига мажбурлаб олиб киргани, қаршилик кўрсатганида уриб, ҳайдовчидан ташқари уч эркак 13 ёшли қизни навбатма-навбат зўрлагани айтилмоқда. Янгаси эса бу ишни 300 доллар қарзи эвазига қилгани келтириб ўтилган.

Маълум бўлишича, воқеанинг эртасига қизнинг катта акаси бундан хабар топган ва айбдорларга нисбатан қонуний чора кўриш даъвоси билан чиққан.

«Газета.uz» ҳолат юзасидан Бухоро вилояти ИИБ матбуот хизмати билан боғланди.

Маълум қилишларича, ҳозирда ИИБ Тергов бошқармаси томонидан Жиноят кодексининг 118-моддаси 4-қисми (Ўн тўрт ёшга тўлмаган шахснинг номусига тегиш) билан жиноят иши қўзғатилиб, тергов ҳаракатлари олиб борилмоқда.

«Айни пайтда қизни чўлга олиб чиқиб, унга зўравонлик қилганликда гумонланган 3 шахс ҳамда ҳайдовчи ушланиб, қамоқда сақланмоқда. Яна бир нечта шахслар ишга гумонланувчи сифатида жалб этилган. Жиноят иши доирасида судга оид тиббий, биологик, психологик, компьютер-техникавий ҳамда ДНК экспертизалари тайинланган. Барча жараёнлар қонун доирасида, ҳаққоний олиб борилади. Тергов якуни бўйича қонунда белгиланган тартибда айбдорларга нисбатан жазо қўлланади», — дейди матбуот хизмати раҳбари Шуҳрат Жалолов.

Юқорида кўрсатилган моддага кўра, ушбу жиноят судда ўз исботини топса, айбланувчи 15 йилдан 20 йилгача озодликдан маҳрум қилиш билан жазоланади.

Ўзбекистон Олий Мажлиси Сенати 6 апрель куни аёллар ва болаларни зўравонликдан ҳимоя қилишни кучайтириш бўйича қонунни маъқуллаган эди.

Қонуннинг моҳияти

Бундан буён жинсий зўравонлик, шу жумладан, вояга етмаганларга нисбатан жинсий зўравонлик содир этган шахсларга нисбатан жазони муддатидан илгари шартли озод қилиш ёки жазони енгилроғи билан алмаштириш мумкин эмас.

Эндиликда вояга етмаганларга нисбатан жинсий зўравонлик қўллаган ҳолда содир этилган жиноят оғир деб ҳисобланади. Айбланувчининг жабрланувчининг ёшини бундан буён билмаслиги уни жавобгарликдан озод этмайди.

Вояга етмаганларга нисбатан жинсий зўравонлик содир этган шахсларга болалар билан ишлаш тақиқланади. Ушбу турдаги жиноятларни содир этган шахслар рўйхатини (реестрини) жорий этиш тартиби белгиланмоқда.