Ўзбекистонда газ қазиб олиш динамикаси 2023 йилнинг иккинчи ярмидан бошлаб ижобий томонга ўзгаради. Бу ҳақда «Газета.uz»га Тошкент инвестиция форуми доирасида энергетика вазири Жўрабек Мирзамахмудов маълум қилди.

Аввал хабар берганимиздек, жорий йилнинг биринчи чорагида газ қазиб олиш ўтган йилнинг шу даврига нисбатан 9,6 фоизга камайган, унга мос равшда март ойида мамлакатга 151,2 млн долларлик газ импорт қилинган. Энергетика вазирлиги раҳбари пасайишни тасдиқлади ва буни «турли омиллар, жумладан техноген омиллар» билан изоҳлади.

«Яқинда объектлардан бирида авариявий тўхташ содир бўлди, бунинг оқибатида суткалик ишлаб чиқариш 2 млн куб метрга қисқарди», — деди у.

Унинг сўзларига кўра, газ қазиб олишнинг камайиши асосан «Ўзбекнефтгаз» тузилмаларига тўғри келган, чунки «компания конларининг 75−80 фоизи ўзлаштирилган, холос».

«Биз ҳозир чора-тадбирларни режалаштирмоқдамиз, ҳар бир компания билан ишлаб чиқаришни қандай оширишни муҳокама қиламиз. Йилнинг иккинчи ярмидан бошлаб бу динамика ўзгаради», — деди у.

Жўрабек Мирзамахмудов газ тармоғидаги вазият «алоҳида назоратда» эканини таъкидлади ва кутилаётган чора-тадбирлар, жумладан, соҳага киритилаётган инвестициялар туфайли нафақат қазиб олишни, балки газ қазиб олишни ўтган йилга нисбатан кўпайтириш режалаштирилган. Бироқ у ишлаб чиқаришнинг прогноз ҳажмларини айтмади.

Аввалроқ Ўзбекистон нефть-газ конларида қайси компаниялар ишлаётгани ҳақида батафсил маълумот берган эдик. Энергетика вазирининг Озодлик радиоси терговига жавобан маълум қилишича, 294 та кондан 118 таси (40%) «Ўзбекнефтгаз»га тегишли, 176 таси эса хорижий компанияларга.

2021 йил 1 январь ҳолатига кўра, энг катта тасдиқланган захиралар «Ўзбекнетфегаз» томонидан бошқарилади — 934,1 млрд куб метр газ (жорий захираларнинг 50 фоизи). «Лукойл» 413,1 млрд куб метр (22,1 фоиз), Uz-Kor Gas Chemical — 109,6 млрд куб метр (5,9 фоиз), Surhan Gas Chemical — 106,6 млрд куб метр (5,8 фоиз), Jizzakh Petroleum (ҳозирги Saneg) (5,8 фоиз) — 84,9 млрд куб метр (4,5%) газ захиралари бўлган конларда иш олиб бормоқда. Ишлаб чиқаришнинг катта қисми ҳам «Ўзбекнефтгаз» ҳиссасига тўғри келади.