Иқтисодиёт ва молия вазирлиги хорижий давлатлар билан икки томонлама солиққа тортишнинг олдини олиш бўйича келишувларни Ўзбекистон манфаатларига мувофиқлигини ўрганади. Бу ҳақда 25 март куни Иқтисодиёт ва молия вазирлиги раҳбари Шерзод Кудбиев Facebook`даги саҳифасида маълум қилди.
Шанба куни Солиқ қўмитаси Ўзбекистонда Yandex Go хизмати қандай тартибга солингани, компания ва такси компаниялари томонидан қанча солиқ тўлангани ҳақида маълумот берган эди. Солиқ кодексига кўра, Нидерландияда рўйхатдан ўтган (Yandex Go иловасини ифода этади) Ridetech International компаниясининг Ўзбекистондаги манбаларидан олинган даромадлари солиққа тортилмайди, чунки Ўзбекистон ва Нидерландия ўртасида даромадларга икки томонлама солиқ солишнинг олдини олиш тўғрисида келишув мавжуд. .
Молиячи Отабек Бакиров нима учун пойтахт ва вилоят марказларида такси хизматлари агрегатори сифатида устун мавқега эга бўлган компания Ўзбекистонда солиқ тўламаслиги кераклиги билан қизиқди. Шунингдек, у Yandex Go ва унинг ҳамкорлари кўрсатилган хизматлар учун фискал чеклар бермаслигини таъкидлади.
Шерзод Кудбиев компаниянинг Ўзбекистондаги фаолиятига оид онлайн муҳокамаларга изоҳ берди.
«Адашмасам агар, икки ёқлама солиққа тортишнинг олдини олиш бўйича Ўзбекистон 54 та мамлакат билан шартномалар имзолаган. Ва бу шартномаларга биз сўзсиз амал қилишимиз керак бўлади. Энди, булар бизнинг манфаатларимизга мос келадими ёки йўқми? Бу борада Иқтисодиёт ва молия вазирлиги ўзининг позицияси, сиёсати ва таклифларини ишлаб чиқяпти. Ўйлайманки, яқин орада, бир ой ичида ҳукуматга ўз таклифларимизни киритамиз», — деди иқтисодиёт ва молия вазири.
Унинг сўзларига кўра, гап «Ўзбекистонда тадбиркорлар манфаатларига риоя қилиш ва бозорда ҳамма учун тенг имкониятлар яратиш нуқтаи назаридан» қонунчилик базасини яратиш бўйича таклифлар ҳақида бормоқда.
Аввалроқ Yandex Go такси хизматининг Ўзбекистондаги фаолияти туфайли монополияга қарши орган ва Солиқ қўмитаси танқидга учрагани ҳақида ёзган эдик. Рақобатни ривожлантириш қўмитаси «Яндекс.Такси» ва бошқа хорижий хизматларнинг рўйхатдан ўтмагани монополияга қарши тартибга солишда қийинчиликлар туғдираётганини тан олди.
