Тошкентнинг Сергели тумани Файзли кўчасида 19 март куни кечга яқин бешта автомобиль иштирокида йўл-транспорт ҳодисаси содир бўлиб, бир неча киши жабрланди.
Интернетда авария оқибатлари акс этган видеолавҳалар пайдо бўлди. Уларда одамларнинг аварияга учраган машиналардан жабрланганларни чиқариб олаётганлари акс этган.
Ўзбекистон ИИВ ЙҲХБнинг хабар беришича, ЙТҲда Lacetti, Labo, Malibu, Nexia 3 ва Captiva автомобиллари тўқнашган.
Тасвирларда Lacetti олд ва Labo орқа томондан жиддий шикастланганини кўриш мумкин. Бошқа машиналарга ҳам катта зарар етган.
ЙҲХБнинг маълум қилишича, Lacetti ва Labo ҳайдовчилари ва йўловчилари жароҳат олган, уларга биринчи тиббий ёрдам кўрсатиш учун шифохонага етказилган. Жабрланганларнинг аниқ сони айтилмаган.
