Renessans TV журналисти Тошкентдаги «Миллий» стадиони яқинида ҳуқуқ-тартибот идоралари ходимлари томонидан ОАВ ишига тўсқинлик қилингани ва куч ишлатилгани ҳақида хабар берди. Кейинчалик бу маълумот Renessans TV Telegram каналидан олиб ташланди.
17 март куни стадион яқини Ўзбекистон ва Ироқ терма жамоалари ўртасидаги 20 ёшгача бўлган футболчилар ўртасида ўтадиган Осиё кубоги финал учрашувига чипта сотиб олмоқчи бўлган фуқаролар билан тўлди. Ўйин 18 март куни бўлиб ўтади.
Телеканалнинг хабар беришича, одамлар кассаларда чипта сотиб олиш учун бир неча соат навбат кутиб, қуёш остида қолиб кетган. Киши бошига сотиладиган чипталар сони фақат битта эканига қарамай, олибсотарларнинг қўлида элликталаб чиптани кўриш мумкин эди.
Renessans TV ҳуқуқ-тартибот идоралари ходимлари телеканал мухбири Сардорбек Исроиловга нисбатан «куч ишлатгани», «қўпол муомала қилгани, камера ишлатилишига қаршилик кўрсатгани»ни билдирди.
Пойтахт ИИББ муносабати
Тошкент шаҳри ички ишлар бош бошқармаси финал ўйинига чиқиш истагида бўлган мухлислар сони стадиондаги ўриндиқлардан анча кўплигини маълум қилди.
Қайд этилишича, стадионнинг ўзида финал ўйинини томоша қилиш учун чипта сотиб олишга келган ишқибозлар 17 март куни «Бунёдкор» стадионидаги касса олдида жуда кўп тўпланиб кетган. Касса олдига жамоат тартибини сақлаш мақсадида ИИО ходимлари жалб этилиб, унинг олди панжаралар билан тўсилган ҳамда фуқаролар навбат билан кириши таъминланган.
«Бироқ соат тахминан 14:30 да Renessans TV телеканали мухбири ва телеоператори ИИО ходимлари томонидан тўсилган панжарадан ошиб ўтган, бу эса бошқа фуқароларнинг қаттиқ эътирозига сабаб бўлган. Жамоат тартибини сақлаш ва фуқароларни тинчлантириш мақсадида мухбир ва телеоператорга панжарадан ташқарига чиқиши лозимлиги тушунтирилган. ИИО ходимлари томонидан мухбир ҳамда телеоператорга нисбатан ноқонуний ҳаракатлар содир этилмаган ва телеканал техникасига шикаст етказилмаган», — дейилади муносабатда.
ИИББ ОАВ вакилларининг ҳуқуқлари қонун билан кафолатланишини таъкидлаб ўтди.
«Лекин ҳуқуқ бор жойда мажбурият ҳам борлигини унутманг. ИИО ходимларининг асосий вазифаларидан бири жамоат тартибини сақлаш, фуқаролар хавфсизлигини таъминлашдир. Ижтимоий тармоқларда тарқалган видеолардан ҳам ўзингиз кўриб гувоҳ бўлганингиздек, стадион кассалари олдида кўплаб фуқаролар тўпланиб кетган, навбатсиз чипта олишга бўлган уринишлар эса аянчли якун топиши мумкин эди. Ҳуқуқни муҳофаза қилувчи орган ходимларининг ўз вақтида аралашувчи сабабли касса олдида жамоат тартиби бузилишига ёки бошқа ҳуқуқбузарлик ва жиноят содир этилишига йўл қўйилмади», — дея маълум қилди бош бошқарма.
Пойтахт ИИББ «ходимларининг ўз хизмат вазифаларини бажараётганда вазиятни тўғри қабул қилишни» сўради.
Маълумот учун, Renessans TV 2021 йилнинг сентябрида очилган. Ўзбекистон Миллий медиа ассоциацияси муассис ҳисобланади.
2022 йил июнь ойида ҳам Тошкентдаги «Бунёдкор» стадиони яқинида юзлаб мухлислар U-23 Осиё кубоги финал учрашувига чипта сотиб олишга йиғилганди. Одамларнинг тўпланиши тартибсизликларга олиб келган. Ҳуқуқ-тартибот идоралари уларни тарқатиш учун кўздан ёш оқизувчи газ ишлатгани хабар қилинган, бироқ Миллий гвардия махсус техника ва куч қўлланганини рад этган.
