16 март куни Анқарада бўлиб ўтган Туркий давлатлар ташкилотининг (ТДТ) навбатдан ташқари саммитида Ўзбекистон Туркий инвестиция жамғармасини ташкил этиш тўғрисидаги битимни имзолади. Унинг устав фонди 500 миллион долларни ташкил этади, деб хабар берди Kapital.kz.
Жамғарманинг устав капитали ҳар бирининг номинал қиймати 50 минг доллар бўлган 10 мингта акцияга ажратилади. У тўланган ва жалб қилинган акцияларга бўлинади. Тўланган акцияларнинг умумий номинал қиймати 350 миллион долларни, жалб қилинган акцияларнинг умумий номинал қиймати эса 150 миллион долларни ташкил этади.
Бешта давлатнинг ҳар бири — Озарбайжон, Туркия, Қозоғистон, Қирғизистон ва Ўзбекистон — 2000 тадан бошланғич акцияларни олади, лекин тўланган акциялар учун тўртга бўлиб тўлаши керак: инаугурацион йиғилишдан кейин 90 кун ичида 5 миллион доллар миқдоридаги дастлабки тўлов, кейин эса 3 та — йиллик тўловлар мос равишда 18 миллион, 23 миллион ва 24 миллион доллар миқдорида (ҳар бир мамлакат учун жами 70 миллион доллар). Жалб қилинган акциялар доирасида ҳар бир давлатнинг улуши 30 миллион долларни ташкил этади.
Халқаро молия ташкилоти мақомига эга Туркий инвестиция фондининг бош қароргоҳи Истанбулда жойлашган бўлиб, 20 йил давомида фаолият юритади. Аммо бошқарув кенгаши фонднинг ишлаш муддатини узайтириши ёки тўхтатиши мумкин.
Инвестиция фондини яратиш ташаббуси Туркия президенти Режеп Таййип Эрдоғанга тегишли бўлиб, у бу таклифни 2022 йил ноябрида Самарқандда бўлиб ўтган ТДТ саммитида билдирган эди.
Ўша саммитда президент Шавкат Мирзиёев ушбу ғояни қўллаб-қувватлаб, ТДТда янги иқтисодий имкониятлар маконини яратиш ташаббусини илгари сурган.
16 март куни Анқарада бўлиб ўтган ТДТнинг навбатдан ташқари саммитида Ўзбекистон раҳбари кутилмаган синовлар вақтида ижтимоий ва иқтисодий муаммоларни бартараф этишда яқин ҳамкорлик ва қўллаб-қувватлаш механизмларини жорий этиш мақсадга мувофиқлигини таъкидлади. Гап озиқ-овқат ва қурилиш материалларини тўсиқсиз етказиб бериш, саноатни тиклашга қаратилган кооперация лойиҳаларини йўлга қўйиш ҳақида бормоқда.
«Бугунги кунда расман ташкил этилган Туркий инвестиция фондининг биринчи молиявий ресурсларини ушбу лойиҳаларга жалб қилиш мумкин, деб ҳисоблаймиз», — деди у.
