Иқтисодиёт ва молия вазирлиги Ўзбекистоннинг 10 та энг йирик солиқ тўловчиларини эълон қилди. Ушбу компаниялар 2023 йилда давлат бюджети даромадларининг 31,2 фоизини таъминлаши прогноз қилинмоқда.

  1. Навоий кон-металлургия комбинати (НКМК) — 14,8%
  2. Олмалиқ кон-металлургия комбинати (АГМК) — 8,1%
  3. «Ўзбекнефтгаз» АЖ — 1,8%
  4. «Ўзтрансгаз» АЖ — 1,7%
  5. «Ҳудудгазтаъминот» АЖ — 1,2%
  6. «Uzbat» АЖ — 1,1%
  7. АЖ «Ўзавтосаноат» — 0,9%
  8. «Бухоро нефтни қайта ишлаш заводи» МЧЖ — 0,6%
  9. ««Uz-Kor Gas Chemical» МЧЖ ҚК — 0,6%
  10. «Ўзбекистон металлургия комбинати» АЖ — 0,4%

бюджет, солиқ тўловчилар

2022 йилда ушбу компанияларнинг давлат бюджети даромадларидаги улуши 36,44 фоизни ташкил этиши прогноз қилинган эди.

2018 йилда прогноз даромадларининг 34 фоизи 20 та йирик солиқ тўловчилар ҳисобига тўғри келганди, яъни давлат бюджети даромадлари манбалари кўпроқ диверсификация қилинганди.

Ўша вақтда «Ўзтрансгаз» улуши 5,1 фоиз, НКМК — 5 фоиз, ОКМК — 3,1 фоизни ташкил этганди. Шунингдек, рўйхатга «Қизилқумцемент» — 1,2 фоиз, Фарғона нефтни қайта ишлаш заводи — 1,2 фоиз, Coscom (Ucell) — 1 фоиз, «Ўзбекистон-Хитой» газ қувури оператори Asia Trans Gas — 1,2 фоиз, Оҳангаранцемент — 0,6 фоиз, Тошкентвино — 1,1 фоиз ва бошқалар киритилганди. Бу компанияларнинг бир қисми хусусийлаштирилганди.

Шундай қилиб, 2023 йилги давлат бюджети 2018 йилга нисбатан йирик давлат компанияларига кўпроқ қарам бўлиб қолди. 2022 йилда НКМК ва ОКМК улуши мос равишда 17,82% ва 9,4%, 2021 йилда 20,1% ва 6,4%, 2020 йилда 13,5% ва 4,6%, 2019 йилда 6,8% ва 3,6% ни ташкил этганди.