Бухоро шаҳрида «Бухоро туризм маркази»ни қуриш учун «бошқа мақбул ер майдонлари танланади». Бухоро вилояти ҳокимлиги матбуот хизмати ахборотига кўра, бу ҳақдаги қарор «кенг жамоатчилик фикрини инобат олиб» қабул қилинган.
Қайд этилишича, ҳозирда ушбу лойиҳа дастлабки босқичда тайёрланмоқда ва пухта ишлаб чиқилгач, тегишли тартибда барча келишувлардан ўтказилади.
«Шунингдек, ЮНЕСКО умумжаҳон марказининг тегишли хулосаси олинган ҳолда якуний қарор қабул қилинади ва шундан сўнг қурилиш ишлари бошланади», — дейилади ҳокимлик ахборотида.
Айни вақтда, Davletovuz Телеграм-канали ўз манбаларига таяниб ёзишича, «Шавкат Мирзиёев жамоатчиликнинг эътирозига сабаб бўлган Бухоро шаҳрида қурилиши режалаштирилган туристик марказ қуришни тўхтатишга топшириқ берган».
Аввал хабар берилганидек, Бухоро шаҳрида туристик марказ қурилиши режалаштирилмоқда. Буюртмачи сифатида Самарқандда худди шундай марказни қурган Enter Engineering компанияси танланган. 32,6 гектар майдонни эгаллаган мажмуани қуриш учун ҳокимликлар, прокуратура, спорт аренаси ва бошқа бинолар бузилиши мумкин. Аҳоли бунга қарши чиқиб, президентга мурожаат қилган.
Alerte Heritage маданий мерос обсерваторияси Бухоро шаҳри ва Бухоро вилояти ҳокимликлари бинолари тақдири юзасидан хавотир билдирди (обсерватория вакилларининг таъкидлашича, ушбу бинолар «ялтироқ-алюкобонд қопламали ёки ўзига ўзи сохта тарихий пародия бўлиб қолиш хавфи остида» қолган).
Kun.uz'нинг ёзишича, туристик марказ қурилиши учун танланган дастлабки ер майдони Бухоронинг тарихий марказининг буфер ҳудудида жойлашган, шу боис ЮНЕСКОнинг Ўзбекистондаги ваколатхонаси ушбу лойиҳани қўллаб-қувватламаган. Маданий мерос агентлигининг ҳукуматга эслатишича, ушбу соҳадаги ҳар қандай лойиҳа агентлик ва ЮНЕСКО билан келишилиши керак.
