250 та уй-жой мулкдорлар ширкатлари томонидан 20 млрд сўм маблағлар талон-тарож қилинган, 50 га яқин ширкат раҳбарига жиноий иш қўзғатилган. Бу ҳақда АОКАда ўтказилган брифингда Уй-жой фонди инспекцияси раҳбари Азлар Содиқов маълум қилди.
1 декабрь ҳолатига Уй-жой фонди инспекцияси томонидан кўп квартирали уйларга хизмат кўрсатувчи жами 1000 га яқин бошқарув органлари фаолияти ўрганилди. Ўрганиш натижаларига кўра 250 та уй-жой мулкдорлар ширкатлари томонидан жами 20 млрд сўм маблағларни талон-торож ёки уй-жой мулкдорларига зарар етказгани аниқланди. Шундан, 50 га яқин ширкат рахбарларига нисбатан жиноий ишлар қўзғатилиб 700 млн сўмга яқин маблағлар ширкатлар хисобига қайтарилган.
Шунингдек, кўп квартирали уйлар ва уларга тегишли туташ худудларда олиб борилган таъмирлаш-тиклаш ишлари ўрганилганда жами қиймати 14 млрд сўм миқдорда 57 та қонун бузилиш ҳолатлари аниқланган. Хозирда пудрат ташкилотларига нисбатан жиноий ишлар қўзғатилган.
Кўп квартирали уйларнинг бошқарув органлари томонидан йиғиладиган мажбурий бадаллар маблағларининг шаффофлигини таъминлаш юзасидан ташкил этилган «Менинг уйим биллинг» тизими орқали хисоб юритилишини таъминлаш мақсадида махсус штаб ташкил этилган бўлиб, 3 ой мобайнида 1500 та мурожаатлар қабул қилинган. Шундан, 1200 таси жойида ижобий хал этилган, 200 тасига нисбатан мажбурий кўрсатмалар берилилган, 100 га яқин ширкатлар бошқарув қоидаларини бузганлиги учун 300 млн сўм миқдорда маъмурий жарималар қўлланилган.
Кўп квартирали уйларнинг ер тўлаларидан фойдаланиш тартиби ўрганилганда 550 та хуқуқбузарлик ва камчиликлар аниқланган. Шундан, 425 та ўзбошимчалик билан ертўлаларни эгаллаб олиш ёки қайта режалаштириш ишлари ҳамда 125 та ертўлаларнинг санитар тартибга риоя этилмагани аниқланган. Ҳолат юзасидан хуқуқбузарларга нисбатан жами 670 млн сўм миқдорда 247 та маъмурий жарималар қўлланилди ҳамда 290 та ертўладаги ўзбошимчалик билан ўзгартиришлар аввалги ҳолатига қайтарилган.
