Ўзбекистон ташқи ишлар вазири Владимир Норов ва АҚШ Давлат котибининг Жанубий ва Марказий Осиё масалалари бўйича ёрдамчиси Дональд Лу 13 декабр куни Вашингтонда йиллик стратегик шериклик мулоқотини ўтказди. Унинг натижалари бўйича қўшма баёнот АҚШ Давлат департаменти томонидан тақдим этилди.
АҚШ номидан Дональд Лу Ўзбекистонга C5+1 дипломатик форматидаги асосий иштироки учун миннатдорчилик билдирди ва ушбу форматнинг «муаммоларни биргаликда ҳал қилиш ва янада фаровон ва хавфсиз Марказий Осиёни яратиш учун муҳимлигини» таъкидлади.
Ҳукумат вакиллари Ўзбекистонни ислоҳ қилиш дастурини ҳам муҳокама қилар экан, АҚШ Давлат котибининг ёрдамчиси уларни қўллаб-қувватлашини яна бир бор таъкидлаб, АҚШ ҳукумати иқтисодиёт, таълим ва инсон ҳуқуқлари соҳаларидаги ислоҳотларни илгари суришда ёрдам бераётганини таъкидлади.
Делегациялар икки мамлакатда савдо-инвестициявий шерикликни ривожлантириш ва ишбилармонлик фаоллиги учун қулай муҳитни сақлаб қолиш қатъий эканини қайд этди. Бундан ташқари, Ўзбекистон ва АҚШ ҳукуматлари вакиллари оммавий ахборот воситалари эркинлиги, журналистларни ҳимоя қилиш ва фуқаролик жамиятини қўллаб-қувватлаш масалаларини муҳокама қилди.
Томонлар Афғонистон борасидаги саъй-ҳаракатларни ҳам муҳокама қилиб, АҚШ Ўзбекистонга гуманитар ёрдам кўрсатишдаги ҳамкорлиги учун миннатдорлик билдирди.
Делегациялар чегара назорати ва мудофаа қобилиятини мустаҳкамлаш, гиёҳвандлик ва терроризмга қарши кураш каби асосий хавфсизлик масалалари бўйича ҳамкорлик масаласига ҳам эътибор қаратди. Дональд Лу Ўзбекистон минтақада тинчлик ва хавфсизликка содиқлигини айтиб ўтди.
Қўшма Штатлар Ўзбекистоннинг янги савдо йўлларини йўлга қўйиш ва импорт-экспорт бозорларини диверсификация қилиш, минтақавий алоқани мустаҳкамлаш, чиқиндиларни камайтириш бўйича глобал мажбуриятни қабул қилиш ва иқлим инқирозига қарши курашиш бўйича бошқа саъй-ҳаракатларни, шунингдек, мамлакатнинг иқтисодий ислоҳотларни, жумладан, хотин-қизлар масаласида ҳам тарғиб қилиш истагини мамнуният билан қабул қилди. Қўшма Штатлар ушбу саъй-ҳаракатларни қўллаб-қувватлашга тайёрлигини билдирди, дейилади баёнотда.
Дональд Лу, шунингдек, Ўзбекистоннинг тинчлик корпуси дастурини қайта тиклашдан манфаатдор эканини юқори баҳолади. Бундан ташқари, икки мамлакат ҳукуматлари жиддий касалликлар хавфига қарши курашиш ва юқори сифатли тиббий ёрдам кўрсатиш бўйича муваффақиятли ҳамкорликни давом еттиришга тайёр эканликларини таъкидлади. Ўзбекистон ва АҚШ стратегик шериклик мулоқоти «томонларни қизиқтирган чуқур масалалар бўйича умумий тил топишишда муҳим аҳамиятга эга» эканини тасдиқлади. Владимир Норов ва Дональд Лу уни 2023 йилда яна ўтказишга рози бўлишди.
Эслатиб ўтамиз, Ўзбекистон ва АҚШ ўртасидаги стратегик шериклик мулоқоти 2021 йилда «икки томонлама муносабатларнинг ажралмас қисми бўлган кенг кўламли масалалар ва умумий устувор йўналишларни муҳокама қилиш мақсадида» очилган эди.
Аввалроқ, 12 декабр куни Владимир Норов АҚШ Давлат котиби Энтони Блинкен билан ҳам учрашганди. Давлат департаменти маълумотларига кўра, томонлар Ўзбекистон ва АҚШ ўртасидаги икки томонлама муносабатлар, Украина ва Афғонистон халқларини қўллаб-қувватлаш ва «Марказий Осиёдаги ўзгарувчан геосиёсий манзара шароитида шериклик» масалаларини муҳокама қилди.
«Давлат котиби, шунингдек, жорий йилда Қорақалпоғистонда тартибсизликларда айбланаётганларга нисбатан тўлиқ ва ошкора тергов ва Одил судлов ўтказиш муҳимлигини таъкидлади», дейилади хабарда. Аввалроқ, АҚШ Нукус воқеалари иштирокчиларининг суд жараёни бошида шундай мурожаат билан чиққанди.
Энтони Блинкен Ўзбекистонда жорий этилган ислоҳотларни мамнуният билан қабул қилди ва ҳукуматни инсон ҳуқуқлари ва асосий эркинликларини ҳимоя қилиш, фуқаролик жамиятини қўллаб-қувватлаш, оммавий ахборот воситалари эркинлигини таъминлаш ва гендер тенглик асосидаги зўравонликка қарши курашиш чора-тадбирларини тўлиқ амалга оширишга чақирди.
АҚШ Давлат котиби мамлакатнинг Ўзбекистоннинг ишончли ҳамкори бўлиши ва Марказий Осиёда фаровонлик, хавфсизлик ва демократияни таъминлашга ҳисса қўшиши бўйича истагини яна бир бор тасдиқлади.
