Американинг «Тинчлик корпуси» (Peace Corps) хайрия ташкилоти Ўзбекистонда ўз фаолиятини қайта тиклашга ҳозирлик кўрмоқда. Бу ҳақда пайшанба куни бўлиб ўтган матбуот анжуманида АҚШнинг Тошкентдаги янги элчиси Жонатан Хеник маълум қилди, деб ёзди «Газета.uz» мухбири.
««Тинчлик корпуси» Ўзбекистонда амалга оширган энг яхши дастурларимиздан биридир. Биламан, кўпчилик ўзбеклар «Тинчлик корпуси» кўнгиллиларини эслайдилар… «Тинчлик корпуси»да кўнгилли бўлиб ишлаганлар АҚШда Ўзбекистон [манфаатларининг] энг кучли ҳимоячиларидир… Биз «Тинчлик корпуси» фаолиятини қайта тикламоқчимиз. Бу борада Ўзбекистон ҳукумати билан принципиал келишувга эришдик», — деди Америка дипломатик миссияси раҳбари.
Унинг сўзларига кўра, ҳозирда дастур тафсилотлари ишлаб чиқилмоқда. «Биз ҳозир дастур тафсилотларини, у қандай бўлишини ишлаб чиқишга ҳаракат қилмоқдамиз. Биз хайрия дастурини муҳокама қилиш учун „Тинчлик корпуси“ делегациясини таклиф қилишга ҳаракат қиляпмиз. Бу бироз вақт талаб этади», — деди элчи.
Фото: Шухрат Латипов / «Газета.uz».
«Тинчлик корпуси» 1961 йил 1 мартда ташкил этилган АҚШ ҳукуматининг мустақил федерал агентлигидир. Ташкилот ўнлаб турли мамлакатларга таълим, тадбиркорлик, ахборот технологиялари, қишлоқ хўжалиги ва атроф-муҳитни муҳофаза қилиш соҳаларида давлат идоралари, университетлар ва мактаблар, нодавлат ташкилотлар ва тадбиркорлар билан ҳамкорлик қилиш учун кўнгиллиларни юборади.
1992 йилдан буён ташкилотнинг Ўзбекистондаги дастурига ичимлик сувини тозалаш лойиҳалари, ОИТСга қарши кураш, кичик бизнесга ёрдам бериш ва бошқалар кирган.
2005 йил июнь ойида «Тинчлик корпуси» Ўзбекистонда «ҳокимият босими» туфайли ўз фаолиятини тўхтатганини эълон қилганди. Хусусан, Ташқи ишлар вазирлиги 52 нафар кўнгилли ва мамлакат ваколатхонаси раҳбарининг визаси муддатини узайтирмагани маълум қилинганди.
«Тинчлик корпуси» Ўзбекистондаги фаолияти давомида 700 дан ортиқ Америка фуқароларини мамлакатга жўнатган.
1961 йилдан бери 178 мингдан ортиқ америкаликлар «Тинчлик Корпуси» кўнгиллилари бўлди. «Хизмат» 27 ой давом этади, у камида 18 ёшга тўлганларни қабул қилади.
