22 ноябрь куни Париждаги Елисей саройида Шавкат Мирзиёев ва Франция давлат раҳбари Эммануэль Макрон музокара ўтказди, дея хабар бермоқда Ўзбекистон президент матбуот хизмати.
Давлат раҳбарлари Ўзбекистон ва Франция ўртасидаги ўзаро манфаатли ҳамкорликни янада кенгайтириш масалаларини атрофлича кўриб чиқди ва муносабатларни ривожлантиришга келишиб олди.
Бу йил икки мамлакат ўртасида дипломатик муносабатлар ўрнатилганининг 30 йиллиги нишонланмоқда. Томонлар алоқалар жадал ривожланиб бораётгани, кенг сиёсий мулоқот чуқурлашиб, халқаро ташкилотлар доирасида томонлар ўзаро кўмаклашаётгани, парламентлараро мулоқот кенгайганини қайд этди.
Ташриф арафасида ўтказилган Ўзбекистон-Франция ишбилармонлик тадбирларининг якунлари, уларнинг доирасида умумий қиймати 6 миллиард евродан ортиқ бўлган савдо-иқтисодий битим ва шартномалар имзоланди.
Шунингдек, томонлар Самарқандда Франция альянсининг бўлинмаси очилишини қўллаб-қувватладилар ҳамда жорий йил 27−28 ноябрь кунлари Парижда иккинчи Ўзбекистон-Франция таълим форумининг ўтказилиши масаласига ҳам тғталиб ўтди. Француз тили ўқитувчиларини тайёрлаш соҳасидаги ҳамкорликни ривожлантиришга келишиб олинди. Якунда Шавкат Мирзиёев Эммануэль Макронни ўзи учун қулай вақтда Ўзбекистонга боришга таклиф қилди.
Фото
