Фуқароларнинг банклардаги омонатларини кафолатлаш фонди Кузатув кенгашининг 2022 йил 18 ноябрдаги қарорига асосан «Туркистонбанк» омонатчиларининг маблағларини муддатидан аввал қайтарилиши белгиланди. Бу ҳақда Марказий банк матбуот хизмати хабар берди.
Унга кўра, 21 ноябрдан бошлаб «Туркистонбанк» омонатчилари бўлган жисмоний шахслар омонатга жойлаштирган маблағлари юзасидан агент-банк сифатида танланган «Қишлоқ қурилиш банк»га мурожаат этишлари мумкин бўлади.
«Омонатчилар қайтариб олинаётган пул маблағларини ўзлари хоҳлаган тарзда — нақд пул шаклида олиши, банк картасига кўчириши ёки агент-банк бўлган «Қишлоқ қурилиш банк»га омонатга қўйиши мумкин», — дейилади банк хабарида.
Фуқароларнинг омонатлари бўйича ҳақ тегишли ҳужжатларнинг асл нусхалари (паспорт, омонат дафтарчаси, омонат шартномаси, нотариус томонидан тасдиқлаган ишончнома) кўрсатилган тақдирда омонатчиларнинг қонуний вакилларига ёки уларнинг ҳуқуқий ворисларига ҳам тўлаб берилади.
Маълумот учун, Марказий банкнинг 7 октябрдаги тегишли қарорлари билан «Туркистон» ва Hi-tech bankъдан банк фаолиятини амалга ошириш ҳуқуқини берувчи лицензиялар чақириб олинганди. Шунингдек, банкларни тугатиш комиссияси таркиби тайинланганди. Унда омонатчиларининг барча маблағлари 2 ойдан сўнг тўлиқ қайтарилиши назарда тутилган.
4 ноябрь куни Марказий банкка бир гуруҳ фуқаролар томонидан «Туркистонбанк» ХАТБ омонатига жойлаштирилган пул маблағларини банк ходимлари субординар қарз сифатида расмийлаштирганлиги ва бугунги кунда банкка берилган қарз маблағларининг қайтарилиши кафолатланмаганлиги юзасидан мурожаатлари келиб тушганди.
Регулятор мазкур мурожаатларни кўриб чиқиш жараёнини назоратга олгани, уларда қайд этилган масалалар бўйича тегишли ўрганиш ишлари олиб борилаётганини қайд этганди.
