Тошкент вилоятидаги Ангрен иссиқлик электр станциясининг энергоблокида 13 ноябрь, якшанба куни носозлик юзага келди, дея хабар бермоқда Энергетика вазирлиги матбуот хизмати. Вазирликнинг «Газета.уз»га маълум қилишича, соат 15:14 да энергоблоклардан бири ўчиб қолган.
«Ушбу носозликни бартараф этиш ишларини жадаллаштириш мақсадида энергетика вазири [Жўрабек Мирзамаҳмудов] бошчилигида вазирлик раҳбарияти зудлик билан мазкур станцияга етиб борди», — дейилади вазирлик ахборотида.
Носозликни бартараф этиш бўйича махсус бригада ташкил этилган. Энергетика вазирлиги таъмирлаш ишлари қисқа вақт ичида якунланишини таъкидламоқда.
«Ҳозирда Ангрен шаҳрига электр энергияси барқарор етказиб берилмоқда, шунингдек, қисқа вақт ичида иссиқлик энергияси етказиб берилиши йўлга қўйилади», — дея қўшимча қилинган вазирлик ахборотида.
Ангрен ИЭС Ўзбекистоннинг энергетика тизими таркибига киради. У Ангренни ва Тошкент вилоятининг бошқа ҳудудларини электр ва иссиқлик билан таъминлаш учун мўлжалланган. Электр станциянинг ўрнатилган қуввати — 393 МВт. Станция Ангрен конининг қўнғир кўмирида ишлайди. ИЭС ускуналари қуввати 53 МВт, 54 МВт, 68 МВт (иккита) бўлган турбоагрегатлар, шунингдек, қуввати 150 МВт бўлган энергоблокни ўз ичига олади.
«Газета.uz» 2020 йилнинг июнида «Ангрен ИЭС» устидан бошқарув «Янги Ангрен ИЭС» ҳамда кўмир ва каолин қазиб олишга ихтисослашган «Ўзбеккўмир» корхонаси билан биргаликда Қозоғистоннинг «Горние работи» компанияси томонидан таъсис этилган Central Asia Energy компаниясига ўтгани ҳақида хабар берганди. «Иссиқлик электр станциялари» компанияси раҳбари Руслан Мубаракшин Ангрен ва Янги Ангрен ИЭСлар Қозоғистоннинг «Горние работи» компаниясига берилиши ҳақида 2019 йил июнидаёқ маълум қилган эди. У станциялар уч йилга ишончли бошқарувга топширилишини таъкидлаган эди. Унинг сўзларига кўра, табиий газдан фойдаланишни имкон қадар камайтириш ва кўмир ёқиш улушини кўпайтириш режалаштирилган эди.
Айрим ОАВлар станциялар бошқаруви SFI Management Group’нинг қўлида экани ҳақида ёзган. Маълумот учун, Ангрен ИЭС 2021 йилни энг кўп зарар билан якунлаган давлат иштирокидаги корхоналар рўйхатида олтинчи бўлган (зарар миқдори 87,6 млрд сўм).
