Ўзбекистон президенти Шавкат Мирзиёев Венгриянинг етакчи компания ва банклари раҳбарлари билан учрашув ўтказди, дея хабар бермоқда унинг матбуот хизмати.
Тадбирда Венгрия иқтисодий ривожланиш вазири Мартон Надь, Савдо-саноат палатаси раиси Ласло Парраг, OTP Bank раиси Шандор Чаньи, шунингдек, Gedeon Richter, Bonafarm, Wizz Air, Raba Holding, Meditop, Master Good, Kite каби йигирмага яқин энг йирик компания ва корпорациялар раҳбарлари иштирок этди.
Қайд этилишича, мамлакатлар ўртасидаги савдо-иқтисодий ҳамкорлик бўйича охирги 5 йилда товар айирбошлаш 3 баробар кўпайди. Қўшма корхоналар ва инвестициялар ҳажми ошмоқда.
Учрашувда фармацевтика, қишлоқ хўжалиги, озиқ-овқат саноати, электроника ва электротехника, кимё, тўқимачилик, чарм тармоқлари ва автомобилсозлик каби соҳаларда ўзаро манфаатли ҳамкорликнинг истиқболли йўналишлари муҳокама қилинди.
Ўзбекистонда иқтисодиётнинг барча соҳа ва тармоқларини тубдан такомиллаштириш, аҳоли фаровонлигини оширишга қаратилган кенг кўламли ислоҳотлар амалга оширилаётгани таъкидланди.
Шавкат Мирзиёев кейинги йилларда Ўзбекистон иқтисодий сиёсатининг асосий натижаларини: валюта бозори ва фойдани репатриация қилиш эркинлаштирилгани, давлат активлари ва банкларни, саноат ва инфратузилма объектларини хусусийлаштириш дастури бошлангани ва солиқ тизими ислоҳ қилинганини санаб ўтди, дейилади хабарда.
«Янги Ўзбекистоннинг тараққиёт стратегиясида тадбиркорлар учун максимал даражада қулай шароитлар яратиш, юртимизда хорижий бизнес фаолиятини кенгайтириш борасидаги ишларни давом эттириш мақсад қилинган. Энг муҳими, хорижий бизнес янгиланишларимизга ишонди», — дея таъкидлади Шавкат Мирзиёев.
Учрашувда устувор лойиҳаларни молиялаштириш учун қўшма фонд ташкил этилиши ва у тез фурсатда иш бошлаши айтилди.
Фақат Венгрия компаниялари учун мўлжалланган алоҳида саноат зонасини яратиш ва уни барча зарур ишлаб чиқариш инфратузилмаси билан таъминлаш таклиф этилди.
Шавкат Мирзиёевнинг фикрича, бўлажак қўшма лойиҳалар ҳамда уларнинг доирасида венгриялик шерикларнинг илмий ишланмалари, конструкторлик инновациялари ва технологиялари ўзлаштирилиши катта синергетик самара беради.
Тадбирда Ўзбекистон томони Венгрия ишбилармонларига уларнинг инвестиция режаларини рўёбга чиқаришда тўлиқ кўмаклашишга тайёрлиги қайд этилди.
«Ҳар бир тадбиркорни мамлакатимизга келиб, бугунги кунда инвестициялар учун энг яхши жой Ўзбекистон эканлигига шахсан ишонч ҳосил қилишга таклиф этаман!» — деди Ўзбекистон давлат раҳбари.
Шунингдек, Ўзбекистон-Венгрия бизнес форумида умумий қиймати 1 млрд доллардан зиёд инвестиция, савдо ва молиявий келишувлар имзолангани қайд этилди.
Учрашув якунида илгари сурилган барча лойиҳаларни амалга ошириш бўйича аниқ муддатлар ва масъул ижрочилар кўрсатилган комплекс «йўл харитаси»ни қабул қилишга келишиб олинди. Ўзбекистон вазирлик ва идораларига венгриялик ҳамкорларга Ўзбекистонда муваффақиятли тадбиркорлик фаолиятини амалга оширишда ҳар томонлама кўмаклашиш топширилди, дейилади хабарда.
