Ўзбекистонда бир қисм мактаб ўқувчилари ўқув йилини янги авлод дарсликлари билан бошлайди. Бу ҳақда Халқ таълими вазирлиги матбуот хизмати «Газета.uz»га маълум қилди.
Президентнинг 11 майдаги (ПФ-134) қарори билан ХТВга 2022 йил охиригача 3, 6, 7 ва 10-синф ўқувчилари учун, 2023−2024 йилларда эса 4, 5, 8, 9 ва 11- синфлар учун ўқув қўлланмалари, дарсликлар ва ишчи дафтарларини ишлаб чиқиш топширилган эди.
Вазирлик мазкур топшириқ муддатидан аввал бажарилгани ҳақида хабар берди. 3-синф учун янги дарсликлар, жумладан, рус ва инглиз тилларидаги дарсликлар мактабларга етказиб берилган.
«Дастлаб мактаб ўқувчиларини эски дарсликлар билан таъминлаш, декабрь ойида эса тўпламларни янгилаш режалаштирилган эди. Аммо китоблар чоп этиб бўлинганини инобатга олиб, сентябрь ойидан бошлаб янги тўпламларни чиқаришга қарор қилдик», — дея тушунтирди вазирлик.
Халқ депутатлари пойтахт кенгаши сессиясида Тошкент шаҳар халқ таълими бош бошқармасининг биринчи ўринбосари Шукур Бурхонов бугунги кунга қадар мамлакатда дарсликларнинг 60 фоизи чоп этилгани, пойтахтда мактаблар 47 фоизга янги дарсликлар билан таъминлангани ҳақида маълум қилди.
«Қоғоз нархлари улар асосан Украинадан (аслида Россия ва Финляндиядан — таҳр.) келишини ҳисобга олсак, қоғоз нархи кескин кўтарилди. Шу боис ҳукумат томонидан қўшимча маблағ топиш, масалани ҳал этишда бироз кечикиш кузатилди. Лекин ташвишланишга ҳожат йўқ, биз болаларни дарсликсиз қолдирмаймиз. Ўтган йили фойдаланган дарсликларнинг 78 фоизи кутубхоналаримизда сақланмоқда. Улар шартнома асосида давлат ва хусусий мактабларга ажратилган», — деди у.
Шаҳар ХТБраҳбарининг биринчи ўринбосарининг таъкидлашича, дарсликларни утилизация қилиш муддати (2022 йил бошида режалаштирилган эди): бошланғич синфлар учун — 3 йил, юқори синфлар учун — 5 йил.
«Вазирлик [хатарларни] билиб, утилизация қилишга рухсат бермади. Дарсликлар утилизация қилинмаган, улар сақланяпти. Агар 5-сентябрдан бошлаб мактаб ёки синфга дарслик етиб бормаса, биз икки йилдан бери ишлатиб келаётган дарсликдан фойдаланамиз. Кейин эса октябрь, ноябрь, балки йил охиригача ҳаммани 100% янги дарсликлар билан таъминлаймиз», деди у.
2022 йилда 50 463 нафар ўқувчининг биринчи синфга қабул қилиниши кутилмоқда, уларнинг 92 фоизи электрон платформа орқали мактабларга қабул қилинган.
Шукур Бурхонов биринчи синф ўқувчилари учун президент совғаларининг 64 фоизи шакллантирилгани, 13 номдаги маҳсулотдан 8 таси харид қилинганини таъкидлади. «Туман ҳокимликларида кечаю кундуз ишчи гуруҳлар дарсликлар устида, алоҳида президент совғалари устида ишламоқда», — дея ишонтирди у.
Ўтган йили Ўзбекистонда 25 млн дона дарслик чоп этилган бўлса, бугунги кунга қадар режалаштирилган 60 млн дона дарсликдан 35 млн таси чоп этилди.
Май ойида президент томонидан 2026 йилгача Мактаб таълимини ривожлантириш дастури тасдиқланган эди. Унда давлат мактабларига ўқув дастурларига ўзгартиришлар киритиш ва айрим фанлар бўйича дарсликларни танлашга рухсат берилди.
