Июл ойида Тошкент халқаро аэропорти терминалини («Тошкент-2») реконструкция қилишнинг иккинчи босқичи бошланди. Бу келгуси йил охирида якунланиши кутилмоқда, дея маълум қилди Uzbekistan Airports вакиллари жума куни ўтказилган пресс-тур давомида.

Реконструкциянинг биринчи босқичи ўтган йилнинг сентябрm ойида якунланганди — унда учиб кетиш залининг ўнг томони таъмирланди, 1-учиш-қўниш йўлаги ҳам капитал таъмирланди, йўловчиларга қулайлик яратиш учун иккинчи қаватга олиб борадиган, автоуловларни ҳисобга олиш тизими билан жиҳозланган эстакада кўп йиллар ўтгач қайта очилди.

Реконструкция натижасида ҳаво порти ўтказувчанлик қуввати икки бараварга — соатига 1200 дан 2400 йўловчигача ортади, деди реконструкция лойиҳасининг пудратчиси ҳисобланмиш «Узпромхолодмонтаж» қурилиш компаниясининг бош директори Руслан Кулиев.

Реконструкция янги қурилишлар ҳисобига терминал ҳудуди, рўйхатдан ўтиш ва кутиш хоналари, юкларни қабул қилиш зонаси ва чегара назорати секторини кенгайтиришни ўз ичига олади. Умумий майдон 44 мингдан 74,3 минг квадрат метргача ошади.

Duty Free дўкони майдони ва умумий овқатланиш зоналарини кенгайтириш, эсдалик совғалари сотиладиган «Ҳунармандлар шаҳарчаси» ва аэропорт ҳудудида майдони 150 квадрат метр бўлган биринчи капсулали меҳмонхонани очиш режалаштирилган. Терминалда SIM-карталар ва мобил қурилмаларни сотиш пунктлари бўлади, шу жумладан бу ерда IMEI-кодларни рўйхатдан ўтказиш мумкин бўлади.

Қурилиш ишлари олиб борилаётган жўнаб кетиш терминалининг иккинчи қавати 1 сентябрга қадар тайёр бўлади, дея ишонтирмоқда Руслан Қулиев. Кейин янги бино қуриш ва овқатланиш жойини бузиш режалаштирилмоқда. Унинг ўрнида тўртта юк карусели мавжуд бўлган яна бир учиб келиш зали пайдо бўлади. Барча қисмлар битта йирик терминалга бирлаштирилади.

Бугунги кунга қадар Business Lounge залини эски бинонинг CIP-залига кўчириш ишлари аллақачон бошланган.

Йўловчиларни рўйхатга олиш зонасида 50 та янги рўйхатга олиш столлари ўрнатилади. Кутиш ҳудудида эса кўпроқ ўриндиқлар ўрнатилади. 5 та янги юк ташиш каруселлари ўрнатилади, деди Руслан Қулиев.

Аэропорт олдидаги майдон ҳам реконструкция қилиниши кутилмоқда. Иш учиб келувчилар ҳудудидаги кичик автотураргоҳдан бошланди. Кейинчалик, йўловчиларни қабул қилиш зали олдидаги майдон ҳам реконструкция қилинади. У уч қисмга бўлинади: 150 та машинага мўлжалланган автоматлаштирилган автотураргоҳ, ўриндиқлар, фавворалар ва яшил зоналар билан кенгайтирилган пиёдалар ҳудуди, қолаверса, автобус ва таксилар учун алоҳида йўлаклар.

Фото: Uzbekistan Airports.

Мавжуд автобус бекати модернизация қилиниб, майдон сиғими 30 та автобусгача кенгайтирилади. Руслан Қулиев буни автобуслар «рейсларни кутиб олиши ва жўнаб кетиши» билан изоҳлади.

Ўтган йилнинг баҳорида «Uzbekistan Airports» раҳбари Раъно Жўраева реконструкция дастурида «жўнаб кетиш ва келиш учун нормал кириш имконияти» кўзда тутилгани ҳақида хабар берганди. Кўп ўтмасдан, Ўзбекистон президенти Шавкат Мирзиёев аэропортлар, шунингдек, темир йўл ва автовокзалларга киришни соддалаштиришни назарда тутувчи қарорни имзолади. Компания томонидан тақдим этилган эскизларда аэропорт атрофидаги панжаралар кичик устунчалар билан алмаштирилиши кўрсатилган.

Фото: Uzbekistan Airports.

Айни пайтда автотураргоҳларни шаҳар ҳокимлигидан «Uzbekistan Airways» балансига ўтказишнинг якуний босқичи давом этмоқда. Компания Муниципал активларни бошқариш маркази билан автотураргоҳларни қабул қилиш ва топшириш актини аллақачон имзолаган.

Аукцион якунларига кўра, Bobur Diyor аэропортга хизмат кўрсатувчи такси оператори бўлди. У 2017 йилдан буён йўловчи ташиш соҳасида ишлаб келмоқда. Корхона паркида 100 дан ортиқ енгил автомобиль мавжуд. Компания транспорт тарифларини Uzbekistan Airports билан мувофиқлаштириб боради.

«Такси чақирув столи учиб келиш терминали ичида жойлашган бўлади. Унга яқинлашиб, йўловчи қулай усулда йўл ҳақини тўлаши ва керакли манзилни киритиши мумкин бўлади. Шундан сўнг, унга манзил ва тўловни тасдиқлаш кўрсатилган чек берилади. Ушбу чек билан у келган биринчи таксига ўтиради ва уни навигатор бўйича элтиб қўйишади. Шунингдек, йўловчи машинага ўтириб, йўл ҳақини тўғридан-тўғри ҳайдовчига тўлаши мумкин бўлган вариант ҳам мавжуд. Бошқа такси хизматлари бу йўлакка кира олмайди, чунки кираверишда автомобилларни таниб олиш имконига эга шлагбаумли тизим ўрнатилади», — деди «Uzbekistan Airports»нинг жамоатчилик ва ОАВ билан алоқалар хизмати раҳбари Евгения Колосова.

Компания аллақачон автотураргоҳ ускуналарини сотиб олган, уни ўрнатиш яқин келажакда бошланади. Бу ходимлар иштирокисиз кириш ва чиқиш ва тўловларни қабул қилиш имконини беради.

Тўлов автоматлаштирилган терминалда нақд пулда, банк карталари ва мобил иловалар орқали қабул қилинади. Бошқарув компанияси тўхташ вақтини (соат, кун) ҳисобга оладиган тариф тизимини ишлаб чиқмоқда.

Мобил илова орқали автотураргоҳдаги жойларни олдиндан банд қилиш, шунингдек, масофадан туриб тўловларни амалга ошириш имкониятини яратиш режалаштирилган. Автотураргоҳлар, шунингдек, электромобилларни қувватлантириш шохобчалари билан ҳам жиҳозланади.