Ўзбекистонда жорий йилгача ҳеч қачон талон-торож бўлаётган ва қайтмаётган кредитлар масаласи президент даражасигача чиқмаган.
Бу ҳақда 22 июль куни Қонунчилик палатасининг навбатдаги мажлисида бош вазир ўринбосари — иқтисодий тараққиёт ва камбағалликни қисқартириш вазири Жамшид Қўчқоров маълум қилди. Унинг сўзларига кўра, кредитларни талон-торож қилиш бўйича жуда қаттиқ чоралар кўрилмоқда.
Депутат бош вазирга кредит бериш тартибини кўриб чиқиш керакми ёки одамларни кўриб чиқиш керакми дея савол билан мурожаат қилди.
«Одамларни кўриб чиқишдан фойда йўқ, бу муаммони ҳал қилмайди. Кредит беришни кўриб чиқиш керак. Биринчи навдатда имтиёзли кредитларни йўқ қилиш масаланинг ечими бўлади. Қачонки имтиёзли кредит бўлмаса, шунда кредит бериш [жараёни] тартибга тушади», — деди вазир.
«Иккинчидан банкларимизни хусусийлаштириш керак, — деди Жамшид Қўчқоров. — Хусусий эгалари шу банклардан ҳалол, пок, қонуний, тўлов ҳисоби, дивиденд орқали даромад олишга эришиш учун талон-торожга ҳам ўзи қарайди. Албатта, ўғрилик ҳамма жамиятда ҳам бор».
Эслатиб ўтамиз, жорий йил бошида Марказий банк раиси Мамаризо Нурмуратов 2021 йилдан Ўзбекистонда имтиёзли кредитлаш сиёсатини бекор қилиш режалаштирилгани, бироқ коронавирус пандемияси туфайли бу режаларни кейинга суришга тўғри келганини маълум қилганди. Унинг сўзларига кўра, ўтган йили имтиёзли шартларда кредитларнинг 24,6 фоизи берилган ва бу 2018 йилга нисбатан 2 баробар камдир. Шу билан бирга, имтиёзли кредит портфели таркибида муаммоли кредитларнинг улуши юқори даражада қолмоқда.
Май ойи ўрталарида Марказий банк имтиёзли кредитлаш амалиётининг макроиқтисодий самарадорлиги пастлиги ва ушбу амалиёт самарали пул-кредит сиёсати учун жиддий муаммолардан бири эканлигини қайд этганди.
